ރައީސް ޑރ.މުޙައްމަދު މުޢިއްޒަކީ ދިވެހިރާއްޖޭގެ ރާއްޖޭގެ މިނިވަންކަމާއި އިސްތިގުލާލު ހިމާޔަތް ކުރައްވާނެ ބޭފުޅެއް ކަމަށް ހިތަދޫ މެދު ދާއިރާގެ މެންބަރު އަޙްމަދު އަޒާން މަރްޒޫޤް ރޭ ވިދާޅުވެއްޖެެެއެވެ.
''އެމްއެމްޓީވީ'' ގެ ބޮޑު ޚަބަރު ޕްރޮގްރާމުގައި ވާހަކަ ދައްކަވަމުން އަޒާން ވިދާޅުވީ ރާއްޖޭގެ މިނިވަންކަމާއި އިސްތިގުލާލު ކަށަވަރުކުރެއްވުމަކީ ރައީސް ޑރ.މުޙައްމަދު މުޢިއްޒު ރިޔާސީ ކެމްޕޭނުގެ ތެރޭގައި ވެސް ވެވަޑައިގެންނެވި ކަމެއް ކަމަށެވެ. އެގޮތުން ގާނޫނުއަސާސީއަށް ގެނައި ބަދަލަކީ އެ ވައުދު ފުއްދުމަށް ކުރެވުނު މަސައްކަތްތަކުގެ ތެރެއިން މުހިންމު މަސައްކަތެއް ކަމަށް އަޒާން ވިދާޅުވިއެވެ.
ސަރުކާރުގެ ސްޕަރ މެޖޯރިޓީ އޮތް 19 ވަނަ މަޖިލީހުން ދިވެހިރާއްޖޭގެ ޖުމްހޫރިއްޔާގެ ގާނުނުއަސާސީއަށް ގެނައި ބަދަލުތަކުގެ ތެރޭގައި ވަނީ ގާނުނުއަސާސީގެ 262 ވަނަ މާއްދާގެ (ށ) ގެ (3) ވަނަ ނަންބަރުގެ ފަހަތަށް ވަނީ 2 ނަންބަރު އިތުރުކުރެވިފައެވެ. މިގޮތުން ރާއްޖޭގެ ސަރަޙައްދަށް ބަދަލު ގެނައުމާ ގުޅޭ ބިލެއް ނުވަތަ ގާނޫނުއަސާސީއަށް ގެނެވޭ އިސްލާހަކާ ގުޅޭ ބިލެއް ރައްޔިތުންގެ މަޖިލީހުން ފާސްކުރުމުން ރައްޔިތުންގެ އަޣުލަބިއްޔަތު އޮތްތޯ ބެލުމަށް އާންމު ވޯޓެއް ނަގަން ވާނެ ކަމަށް ބަޔާންކޮށްފައިވެއެވެ.
އަޒާން ވިދާޅުވީ މީގެކުރިން އަކުން ގާނޫނުއަސާސީގައި މި ބައި ހިމެނިފައިނުވާ ކަމަށާއި، އެގޮތުން މިދިޔަ ދައުރުގައި ޗާގޯސް މައްސަލައިގައި ދިވެހިރާއްޖޭގެ ސަރަހައްދުން ބައެއް ގެއްލިގެންދާ ކަހަލަ ގޮތަކަށް އޭރުގެ ސަރުކާރުން ކަންތައްތަކެއް ކުރެއްވިކަން ފެނިގެންދިޔަ ކަމަށް އަޒާން ވިދާޅުވިއެވެ.
މިހާރު އަޅުގަނޑުމެންގެ ރައީސަކީ ދިވެހިރާއްޖޭގެ މިނިވަންކަމާއި އިސްތިގުލާލު ހިމާޔަތް ކުރައްވާނެ ބޭފުޅެއް. އެހެންނަމަވެސް ފަހުން މި ފިކުރު ނޫން ފިކުރެއްގެ މިނިވަންކަމާއި އިސްތިގުލާލަށް ގޮންޖަހާފަދަ އެމްޑީޕީއިން ކުރިން ކުރި ކަހަލަ ވެރިކަމެއް ކުރައްވާނެ ބޭފުޅަކު އައިސްފިއްޔާ ވެސް ފަސޭހައެއްނުވާނެ އެގޮތަށް ރާއްޖޭގެ ސަރަހައްދުން ބައެއް ދޫކޮށްލާކަށް.
ގާނޫނުއަސާސީއަށް ގެނައި ބަދަލުތަކުގެ ތެރޭގައި ގާނޫނުއަސާސީގެ 251 ވަނަ މާއްދާގެ (ނ) އަށް ގެނެވުނު އިސްލާހު ހިމެނެއެވެ. އެ އިސްލާހުގެ ދަށުން، އެއްބަސްވުމެއްގެ ދަށުން ނުވަތަ އެނޫންވެސް ގޮތަކުން، ރާއްޖެއިން ބޭރުގެ ފަރާތްތަކަށް ދިވެހިރާއްޖޭގެ ސަރަހައްދުގެ އެއްވެސް ބައެއް އަސްކަރީ ބޭނުމަކަށް ބޭނުންކުރުމުގެ ހުއްދަ ދެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެންނެވެ. ނަމަވެސް އެއްބަސްވުމެއްގެ ދަށުން ހިންގޭ އަސްކަރީ ތަމްރީނުތަކުގައި ބައިވެރިވުން މީގެން އިސްތިސްނާވެއެވެ.
މީގެއިތުރުން ގާނޫނުއަސާސީގެ 3 ވަނަ މާއްދާގެ (ހ) އަދި (ށ) އަށް ގެނެވުނު ބަދަލާއެކު، ދިވެހިރާއްޖޭގެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ގާނޫނަކުންނެވެ. މި އިސްލާހުއި ރާއްޖޭގެ ސަރަހައްދުގެ ގޮތުގައި ކަނޑައަޅާފައިވަނީ ދިވެހިރާއްޖޭގެ އާކިޕެލަޖިކް ބޭސްލައިންތަކުގެ ތެރޭގައިވާ ބިމާއި، ޖައްވާއި ކަނޑާއި، ކަނޑުގެ އަޑީގައިވާ ބިމާއި މިބުނެވިދިޔަ ބޭސްލައިންތަކުން ފެށިގެން ބޭރުގައިވާ ދިވެހިރާއްޖޭގެ ސަރަހައްދީ ކަނޑާއި އެ ކަނޑުގެ އަޑީގައިވާ ބިމާއި، އެ ކަނޑާ ގުޅިފައިވާ ޖައްވެވެ.
މި ލިޔުން ކިޔާލުމުން
