ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަގަށް ނެގި ލެޕްޓޮޕްތައް ހޯދައިފިއެވެ.
ފުލުހުން ބުނީ އެޗްޑީސީން ފަސް ލެޕްޓޮޕެއް ވަގަށް ނަގާފައިވާ މައްސަލައެއްގެ ރިޕޯޓު ލިބިފައިވާ ކަމަށާއި، އެއާއެކު މިހާރު ލެޕްޓޮޕްތައް ހޯދާފައިވާ ކަމަށެވެ. މީގެ އިތުރުން، ލެޕްޓޮޕްތައް ވަގަށް ނެގީ ފަރުކޮޅުގައި ހުރި އެޗްޑީސީގެ ޕްރޮޖެކްޓް އޮފީހުން ކަމަށާއި، މި މައްސަލައިގައި ތުހުމަތުކުރެވޭ މީހާ މިވަގުތު ހުރީ މަސްތުވާތަކެތީގެ މައްސަލައަކާ ގުޅިގެން ހައްޔަރުގައި ކަމަށް ފުލުހުން ބުންޏެވެ. ފުލުހުން ބުނީ މިހާރު މި މައްސަލަ ތަޙުޤީޤު ކުރަމުންދާ ކަމަށެވެ.
އެޗްޑީސީގެ ލެޕްޓޮޕްތަކެއް ގެއްލިފައި މިވަނީ ބިންވެރިޔާ އަދި ގެދޮރުވެރިޔާ ސްކީމްގެ ކޮރަޕްޝަން މައްސަލައެއް ފެންމަތިވެފައިވާ ދަނޑިވަޅެއްގައެވެ. ބިންވެރިޔާ އަދި ގެދޮރުވެރިޔާ ސްކީމްގެ މައްސަލަ ހޫނުވެފައި މިވަނީ ބިންވެރިޔާ ސްކީމްގެ ދަށުން ގޯތި ލިބޭ ފަރާތްތަކުގެ ލިސްޓުގައި ނުހިމެނޭ ބަޔަކަށް ގޯތި ދިން ކަމަށް ބުނެ ސޯޝަލް މީޑިއާގައި ފެންމަތިވި މައްސަލައާ ގުޅިގެންނެވެ. މިގޮތުން ބިންވެރިޔާ ލިސްޓުގައި ނުހިމެނޭ ފަރާތެއް ކަމަށްވާ އެޗް.ޑީ.ސީގެ ކުރީގެ މެނޭޖިންގ ޑިރެކްޓަރ، އިބްރާހީމް ފަޒުލް ރަޝީދުގެ ބޭބެ ކަމަށްވާ އެމް.ޑަބްލިއު.އެސް.ސީ ގެ ޑެޕިއުޓީ މެނޭޖިންގ ޑިރެކްޓަރ، މުޙައްމަދު ފަޒީލް ރަޝީދަށް ގޯތި ދީފައިވާކަން ހާމަވާ ލިޔުންތަކެއް ވަނީ ލީކުކޮށްލައިފައެވެ. މި މައްސަލައިގެ ޖިނާއީ ތަޙުޤީޤެއް އެންޓި-ކޮރަޕްޝަން ކޮމިޝަނާއި ދިވެހި ފުލުހުންގެ ޚިދުމަތުން މިހާރު ކުރަމުންދާއިރު، މި މައްސަލައިގައި ޝާމިލުވާ އިބްރާހީމް ފަޒުލް ރަޝީދު ވަނީ އިއްޔެ އެޗްޑީސީގެ އެމްޑީގެ މަޤާމުން އިސްތިއުފާދެއްވައިފައެވެ.
މި ލިޔުން ކިޔާލުމުން
