މި ދިޔަ އަންގާރަ ދުވަހު ވަނުއާޓޫއަށް އައި ބިންހެލުމުގެ ސަބަބުން މަރުވި މީހުންގެ އަދަދު މިހާތަނަށް 14 އަށް އަރައިފިއެވެ.
އަދި މި ހާދިސާގައި އެކިވަރުގެ އަނިޔާތައް ލިބި ޒަޚަމްވެގެން 200 މީހުންނަށް ފަރުވާދެމުންދާ ކަމަށް ވަނީ ރިޕޯރޓްކޮށްފައެވެ. ސާރޗް ޓީމުތަކުން ދަނީ ވީރާނާވެފައިވާ އިމާރާތްތަކާއި ތަންތަނުގެ ތެރެއިން މީހުން ހޯދަމުގެ މަސައްކަތް ކުރަމުންނެވެ. މަރުވި މީހުންގެ އަދަދު އިތުރު ވާނެކަމަށް ބެލެވެއެވެ.
7.3 މެގްނިޓިއުޑްގެ ބާރު މިނުގައި އައިސްފައިވާ މި ބިންހެލުމުގެ ފަހުން ވަރުގަދަ އާފްޓަރޝޮކްތަކެއް ވެސް ވަނީ އައިސްފައެވެ. މި ބިންހެލުމުގެ ސަބަބުން ކުޑަ ވަގުތުކޮޅަކަށް ސުނާމީގެ އިންޒާރު ވެސް އެދުވަހު ވަނީ ނެރުނެވެ.
މި ބިންހެލުމުގެ ސަބަބުން އެމެރިކާ، ފްރާންސް، ޔޫކޭ އަދި ނިއުޒީލެންޑްގެ އެމްބަސީތަކުގެ އިތުރުން އެހެނިހެން އިމާރާތްތަކަށް ވެސް ގެއްލުން ލިބިފައިވެއެވެ. އަދި ކަރަންޓާއި މޯބައިލް ޚިދުމަތްތައްވެސް ވަނީ ގިނަ އިމާރާތްކުގައި ކެނޑިފައެވެ.
ވަނުއާޓޫ ފުލުހުން ވަނީ ސާރޗް އަދި ރިލީފް އޮޕަރޭޝަންތައް ކުރިއަށްދާއިރު އާންމުންގެ ހަރަކާތްތައް މަދުކުރުމަށްޓަކައި 7 ދުވަހުގެ ކުއްލި ނުރައްކަލުގެ ހާލަތު އިއުލާންކޮށްފައެވެ.
ބިންހެލުމުގެ ސަބަބުން ގާތްގަނޑަކަށް 116،000 މީހުންނަށް އަސަރުކުރާނެކަމަށް އދ. ގެ އޮފީސް ފޯރ ދަ ކޯޑިނޭޝަން އޮފް ހިއުމެނިޓޭރިއަން އެފެއާޒްއިން ބުނެފައިވެއެވެ.
މި ހާދިސާގައި ހާލުގައި ޖެހުނު ފަރާތްތަކަށް އެހީތެރިވުމަށްޓަކައި އޮސްޓްރޭލިއާ އިން ވަނީ އެ ގައުމުގެ ސާރޗް އެންޑް ރެސްކިއު ޓީމުތަކެއް ވަނުއާޓޫއަށް ފޮނުވާނެކަމަށް ބުނެފައިވެއެވެ. މީގެ އިތުރުން އެމެރިކާ އަދި ފްރާންސް އިން ވެސް އެހީތެރިކަން ފޯރުކޮށްދޭނެކަމަށް ބުނެފައިވެއެވެ.
މި ޤައުމު އޮންނަނީ ބިންހެލުން އާއްމުކޮށް އަންނަ ސަރަޙައްދެއްގައެވެ. އަދި ބޮޑެތި ބިންހެލުންތަކާއި އެހެނިހެން ގުދުރަތީ ކާރިސާތައް ވެސް ވަނުއާޓޫ އަށް ގިނައިން ކުރިމަތިވެއެވެ.
މި ލިޔުން ކިޔާލުމުން
