އެންވަޔަރަންމަންޓަލް ޕްރޮޓެކްޝަން އޭޖެންސީ (އީ.ޕީ.އޭ) އާއި ނިއުޒިލޭންޑްގެ އޮކްލޭންޑް ޔުނިވަރސިޓީއާ ދެމެދު ރާއްޖޭގެ ކަނޑު ދޫނިތަކާއި ބަދަލުވެ އުޅޭ ދޫނިތަކާ ބެހޭ ގޮތުން ދިރާސާތަކެއް ކުރުމާ ގުޅޭގޮތުން އެއްބަސްވުމެއްގައި ސޮއިކޮށްފިއެވެ.
އީ.ޕީ.އޭގެ ފަރާތުން މި އެއްބަސްވުމުގައި ސޮއިކުރެއްވީ މޫސުމީބަދަލުތަކާ ތިމާވެއްޓާ ހަކަތައާއި ބެހޭ ވުޒާރާގެ ވަޒީރު، ޠާރިޤް އިބްރާހީމެވެ. މި އެއްބަސްވުމުގެ މައިގަނޑު މަޤްޞަދަކީ ރާއްޖޭގެ ކަނޑު ދޫނިތަކާއި ބަދަލުވެ އުޅޭ ދޫނިތަކާ ބެހޭ ގޮތުން ދިރާސާކުރުމުގެ ޤާބިލުކަން އީ.ޕީ.އޭއަށް އިތުރުކޮށްދިނުމެވެ.
އެ ވުޒާރާއިން ހާމަކޮށްފައިވާ ގޮތުގައި މި މަސައްކަތުގެ ތެރޭގައި ދޫނިތަކުގެ ފަސްގަނޑު އެޅުމާއި، މަޑުކުރުމާއި އަދި ކާނާ ހޯދުމަށް މުހިންމު ސަރަޙައްދުތައް ދެނެގަތުމަށް އިސްކަމެއް ދެވޭނެއެވެ. މީގެ އިތުރުން، ދޫނިތަކުގެ ފަސްގަނޑު އެޅުމާއި މަޑުކުރުމަށް ބޭނުންކުރާ ރަށްތަކަށް ނުރައްކާވެފައިވާ އެހެން ބާވަތްތަކުގެ ސަބަބުން ކުރިމަތިވާ ގޮންޖެހުންތަކަށް ޙައްލު ހޯދުމަށްވެސް މަސައްކަތްކުރެވޭނެއެވެ.
މި އެއްބަސްވުމަކީ ރާއްޖޭގެ ތިމާވެށި ރައްކާތެރިކުރުމާއި، ދިރޭތަކެތީގެ ނަސްލު ދެމެހެއްޓުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ. މި މަސައްކަތުގެ ސަބަބުން ރާއްޖޭގެ މުހިންމު ވެށިތައް ރައްކާތެރިކުރުމަށް އެހީތެރިވެދޭނެ ކަމަށް އުންމީދުކުރާ ކަމަށްވެސް އެ ވުޒާރާއިން ބުނެފައިވެއެވެ.
މި ލިޔުން ކިޔާލުމުން
