ކާބަންއެކްސް ޕުރޮގުރާމު 2.0 އިފްތިތާޙްކޮށްފިއެވެ. މި ޕުރޮގުރާމު އިފްތިތާޙްކުރުމަށް ޗައިނާގެ ވެރިރަށް ބެއިޖިންގައި ބޭއްވި ޚާއްޞަ އިވެންޓުގައި މިނިސްޓަރ އޮފް ސްޓޭޓް ފޮރ ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، ޑރ. މުޢާވިޔަތު މުޙައްމަދު ވަނީ ބައިވެރިވެވަޑައިގެންފައެވެ.
މި އިވެންޓުގައި ވާހަކަފުޅު ދައްކަވަމުން ޑރ. މުޢާވިޔަތު ވަނީ މޫސުމަށް އަންނަ ބަދަލުތަކުގެ އަސަރުތަކާ ކުރިމަތިލުމުގައި އެކުގައި މަސައްކަތްކުރުމުގެ މުހިންމުކަން ފާހަގަކުރައްވާފައެވެ.
ކާބަންއެކްސް ޕުރޮގުރާމަކީ ކާބަން މަދުކުރުމަށް އަލަށް ތަޢާރަފުކުރެވޭ ޓެކްނޮލޮޖީތަކަށް އެހީތެރިވުމަށް ޚާއްޞަކުރެވިފައިވާ ޕުރޮގުރާމެކެވެ. މި ޕްރޮގްރާމުގެ 2.0 ވަރޝަންގައި ޚާއްޞަ އަހައްމިއްޔަތުކަމެއް ދެވެނީ ކާބަން ކެޕްޗަރ، ޔޫޓިލައިޒޭޝަން އަދި ސްޓޯރޭޖް (ސީސީޔޫއެސް)، ކާބަން ރިމޫވަލް، އަދި ދިގު މުއްދަތަކަށް ހަކަތަ ރައްކާކުރުމުގެ ޓެކްނޮލޮޖީތަކަށެވެ.
މި ޕުރޮގުރާމުގެ ދަށުން ދުނިޔޭގެ އެކި ކަންކޮޅުތަކުން ހުށަހަޅާ ޕްރޮޕޯސަލްތައް ބަލައިގަނެ، އެންމެ ފުރަތަމަ ފަހަރަށް ޞިނާޢީ މާޙައުލެއްގައި ޕައިލެޓް ޕްރޮޖެކްޓްތައް ހިންގުމަށާއި، ޕޮޓެންޝަލް ހުރި ސްޓާޓްއަޕްތައް އިންކިއުބޭޓްކުރުމަށާއި، ޤާބިލުކަން އިތުރުކުރުމުގެ މަޝްރޫޢުތަކަށް އެހީތެރިކަން ފޯރުކޮށްދިނުމަށް ވަނީ ރޭވިފައެވެ.
ޚާއްޞަ ގޮތެއްގައި ފާހަގަކޮށްލެވެނީ، ދިވެހިރާއްޖެއިން މި ޕުރޮގުރާމަށް ހުށަހެޅި ދިގު މުއްދަތަކަށް ހަކަތަ ރައްކާކުރުމުގެ ޓެކްނޮލޮޖީގެ މަޝްރޫޢު މި ޕްރޮގްރާމުގެ ދަށުން ހޮވިފައިވާކަމެވެ.
މި ޕުރޮގުރާމުގައި ދިވެހިރާއްޖެއިން ބައިވެރިވުމަކީ، ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ކުރިމަތިލުމުގައި ރާއްޖެއިން ކުރަމުންދާ މަސައްކަތްތަކަށް ލިބޭ ބޮޑު ކުރިއެރުމެއް ކަމުގައި ބެލެވެއެވެ.
