މަތީ ތަޢުލީމުގެ ފަންނުގައި ޚިޔާރުކުރާ ދާއިރާއެއްގެ އެންމެ މަތީ ހިސާބުތަކަށް ދިޔުމުގެ ޢަޒުމް ކޮންމެ ދަރިވަރެއްގެ ކިބައިގައިވެސް އޮންނަންޖެހޭނެ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވިލާ ކޮލެޖްގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ވިދާޅުވީ، 2040 ވަނަ އަހަރާ ހަމައަށްދާއިރު ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ކުރާ މަސައްކަތުގައި އެކި ދާއިރާތަކުން ކިޔަވައިގެން ތިބި ޒުވާނުން ބޭނުންވާ ކަމަށެވެ. އަދި ރާއްޖޭގެ މުހިންމު ސިނާޢަތްތަކުގެ އިސް މަޤާމުތަކުގައި ދިވެހީން މަދުވުމުގެ މައްސަލައަށް އޮތް އެންމެ ދެމެހެއްޓެނިވި ހައްލަކީ ދަސްވެނީން އެފަދަ މަޤާމުތަކަށް އިސްވެގެންދިޔުން ކަމަށް ވަޒީރު ފާހަގަކުރެއްވިއެވެ.
މީގެއިތުރުން، އުފެއްދުންތެރި އީޖާދީ ވިސްނުން ގެންގުޅުމަށާއި، ކަންކަމުގައި އިސްނެގުމަށާއި، މަސައްކަތުގެ މާޙައުލުގައި އެންމެ މަތީ އަޚްލާޤާއި ތެދުވެރިކަން ހިފެހެއްޓުމަށް ދަރިވަރުންނަށް ވަޒީރު ނަސޭހަތްތެރިވެވަޑައިގެންނެވިއެވެ.
މި ލިޔުން ކިޔާލުމުން
