ވޯލްޑް އެތުލެޓިކްސް އިން ގަބޫލުކުރާ މިންގަނޑަށް ފެތޭ ގޮތަށް ހުޅުމާލޭގެ ސިންތެޓިކް ޓްރެކް އަލުން އެޅުމުގެ މަސައްކަތް އަންނަ ބުރާސްފަތި ދުވަހު ފަށާނެ ކަމަށް ސްޕޯޓްސް މިނިސްޓަރ އަބްދުﷲ ރާފިއު ރޭ ވިދާޅުވެއްޖެއެވެ.
"އަހާ" ފޯރަމްގައި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ، ހުޅުމާލޭގައި މިހާރު އޮތް ޓްރެކް މިންގަނޑަށް ނުފެތޭތީ، އެ ތަނުގައި ބާއްވާ މުބާރާތްތަކުގައި އެތުލީޓުން ހޯދާ ރެކޯޑުތައް ބައިނަލްއަގުވާމީ ގޮތުން ބަލައިގަނެވޭނެ އުސޫލެއް ނޯންނަ ކަމަށެވެ. އެހެންކަމުން މިހާރު އޮތް ސިންތެޓިކް ޓްރެކް އެއްކޮށް ނެގުމަށްފަހު، ކަމާބެހޭ މާހިރުންނާއި އެސޯސިއޭޝަނުން އިރުޝާދުދޭ ފެންވަރުގެ "ފުލް ޕޮލިއުރެތޭން" ސިންތެޓިކް ޓްރެކެއް އެޅުމަށް ވަނީ ނިންމާފައެވެ.
މިނިސްޓަރ ރާފިއު ފާހަގަކުރެއްވި ގޮތުގައި އެ މަސައްކަތަށް ބޭނުންވާ ތަކެތި އޯޑަރުކޮށް، ތަފުސީލީ ކުރެހުންތަކުގެ މަސައްކަތް ވަނީ ނިމިފައެވެ. އަންނަ މަހުގެ ފުރަތަމަ ދުވަހު އަމަލީ މަސައްކަތް ފަށައި، އަންނަ އަހަރުގެ ފެބްރުއަރީ މަހުގެ ނިޔަލަށް މަސައްކަތް ނިންމާލެވޭނެ ކަމަށް އުންމީދުކުރައްވާ ކަމަށްވެސް މިނިސްޓަރ ވިދާޅުވިއެވެ. މީގެއިތުރުން، ހދ. ކުޅުދުއްފުށީގައި އަޅާ ސިންތެޓިކް ޓްރެކުގެ މަސައްކަތް ކުރިއަށްދާއިރު، އިންޑިއާގެ ލައިން އޮފް ކްރެޑިޓްގެ ދަށުން ގދ. ތިނަދޫ، ފުވައްމުލައް އަދި ސ. ހިތަދޫގައި ޓްރެކް އެޅުމުގެ މަސައްކަތްވެސް މި އަހަރުގެ ތެރޭގައި ފެށިގެންދާނެ ކަމަށް ރާފިއު ވިދާޅުވިއެވެ.
މި ލިޔުން ކިޔާލުމުން
