ރިސޯޓުތަކުން ސާވިސް ޗާޖުގެ ގޮތުގައި މުވައްޒަފުންނަށް ދިވެހި ރުފިޔާއިން ފައިސާ ދިނުން ހުއްޓުވައި، އެ ފައިސާ ނެގި ކަރަންސީއަކުން ދޭން މަޖުބޫރުވާ ގޮތަށް ވަޒީފާއާ ބެހޭ ގާނޫނަށް ހުށަހެޅި އިސްލާހުގެ މަސައްކަތް އަވަސްކޮށްދިނުމަށް އެދި މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ފޮނުއްވައިފިއެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ފޮނުއްވި މި ސިޓީގައި ކަންބޮޑުވުން ފާޅުކުރައްވާފައިވަނީ، ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު މިދިޔަ އަހަރުގެ ޑިސެމްބަރު މަހު ހުށަހެޅުއްވި މި އިސްލާހު މަޖިލީހުގެ ކޮމިޓީ މަރުހަލާގައި ނުނިމި އެތައް ދުވަހެއް ވެފައިވާތީއެވެ. މުހައްމަދު އިބްރާހިމް ފާހަގަކުރެއްވި ގޮތުގައި ބައެއް ރިސޯޓުތަކުން ސާވިސް ޗާޖު ދިވެހި ރުފިޔާއިން ދެމުންދާތީ، ޓޫރިޒަމް ދާއިރާގެ އެތައް ހާސް މުވައްޒަފުންނަކަށް ލިބެންޖެހޭ ހައްގުތަކަށް ހުރަސްއެޅެމުންދާތީ ކޮމިޓީ މަރުހަލާ އަވަސްކޮށް މަޖިލީހުގެ ތަޅުމުން ގޮތެއް ނިންމުން މުހިންމެވެ.
ވަޒީފާއާ ބެހޭ ގާނޫނުގެ 52 ވަނަ މާއްދާއަށް ހުށަހަޅާފައިވާ މި އިސްލާހުގައިވާ ގޮތުން، ރިސޯޓުތަކުން ސާވިސް ޗާޖުގެ ފައިސާ މުވައްޒަފުންނަށް ދޭއިރު ދިވެހި ރުފިޔާއަށް މާރުކުރުން ހުރަސްއެޅި، ފައިސާ ދޭންޖެހޭނީ އެ ފައިސާއެއް ލިބުނު ކަރަންސީއަކުންނެވެ. މީގެ އިތުރުން، ރިސޯޓުތަކާއި، ހޮޓާތަކާއި، ގެސްޓްހައުސްތަކުގައި އައުޓްސޯސް ކޮށްގެން ދޭ ހިދުމަތްތައް ކަމަށްވާ ޑައިވް ސެންޓަރުތަކާއި، ވޯޓާ ސްޕޯޓްސް އަދި ސުވެނިއާ ޝޮޕްތައް ފަދަ ތަންތަނުގައި ސީދާ ޓޫރިސްޓުންނަށް ހިދުމަތްދޭ އެހެން ކުންފުނިތަކުގެ މުވައްޒަފުންނަށްވެސް ސާވިސް ޗާޖު ދޭންޖެހޭ ގޮތަށް މި ބިލުގައި ވަނީ ހުށަހަޅާފައެވެ.
މައުރޫފް ޒާކިރު މި އިސްލާހު ހުށަހެޅުއްވި މައިގަނޑު ސަބަބަކީ، ނަގާ ބޭރު ފައިސާ ރުފިޔާއަށް މާރުކޮށްގެން ބެހުމުގެ ސަބަބުން މުވައްޒަފުންނަށް ލިބެންޖެހޭ ފުރިހަމަ މަންފާ ގެއްލެމުންދާތީ، އެ މުވައްޒަފުންގެ ހައްގުތައް ފުރިހަމައަށް ހިމާޔަތްކޮށްދިނުމެވެ.
މި ލިޔުން ކިޔާލުމުން
