އާޓިފިޝަލް އިންޓެލިޖެންސް އިންސާނުންގެ ކޮންޓްރޯލްގެ ދަށުގައި ބޭއްވުމަށް ބައިނަލްއަޤްވާމީ އެއްބާރުލުން އިތުރުކުރުމަށާއި، ވަކި މިންގަނޑުތަކެއް ކަނޑައަޅައި ތަންފީޒުކުރާނެ ދުނިޔޭގެ ފެންވަރުގެ ބަލަދުވެރި އިދާރާއެއް އުފެއްދުމަށް 20 ޤައުމަކާއި ޔޫރަޕިއަން ޔޫނިއަން އިން ގުޅިގެން ގޮވާލައިފިއެވެ.
ހޯމަ ދުވަހު މި ބަޔާން ނެރުނު ޤައުމުތަކުގެ ތެރޭގައި ޖަރުމަނުވިލާތް، ދެކުނު އެފްރިކާ، ކެނެޑާ، އޮސްޓްރޭލިއާ، ޔޫއޭއީ އަދި ސިންގަޕޫރު ހިމެނެއެވެ. މި ގޮވާލުން ނެރެފައިވަނީ އދ. ގެ ޢާންމު މަޖިލީހުގެ އަހަރީ ބައްދަލުވުމުގައި ދުނިޔޭގެ ލީޑަރުން އޭއައިގެ ސަބަބުން ކުރިމަތިވެދާނެ ނުރައްކާތަކާ ގުޅޭގޮތުން މަޝްވަރާކުރުމަށް ތައްޔާރުވަމުންދާ ދަނޑިވަޅެއްގައެވެ.
ފިންލޭންޑުގެ ރައީސްގެ އޮފީހުން ޢާންމުކުރި ޤަރާރެއްގައި، އޭއައި ތަރައްޤީކުރެވެނީ ބައިނަލްއަޤްވާމީ ޤާނޫނުތަކާ އެއްގޮތަށް އަދި އިންސާނުންގެ ފުރިހަމަ ކޮންޓްރޯލާއި ބެލެހެއްޓުމުގެ ދަށުންކަން ކަށަވަރުކުރުމަށް ވަގުތުން ފިޔަވަޅު އެޅުމަށް ވަނީ ގޮވާލާފައެވެ. އަދި އޭއައިގެ ފައިދާތައް ޙާޞިލުކޮށް ނުރައްކާތައް ކުޑަކުރުމަށްޓަކައި ޞިނާޢަތްތަކާއި ސަރުކާރުތަކުން ގުޅިގެން މަސައްކަތްކުރަންޖެހޭ ކަމަށާއި، ޤައުމުތަކުގެ މެދުގައިވާ ފަރަގު ބޮޑުވިޔަނުދިނުމަށް ވެސް ބަޔާނުގައި ފާހަގަކޮށްފައިވެއެވެ.
މި ޤަރާރުގައި ޖަރުމަނުވިލާތް، ނޯވޭ، ކެންޔާ، ކަޒަކިސްތާން، ތުރުކީވިލާތް އަދި ޔޫރަޕިއަން ކޮމިޝަންގެ އިސް ވެރިން ސޮއިކުރައްވާފައިވީ ނަމަވެސް، އޭއައިގެ ދާއިރާގައި އެންމެ ކުރިއަރާފައިވާ އެމެރިކާ، ޗައިނާ، އިންޑިއާ، އިނގިރޭސިވިލާތް، ޖަޕާން، ދެކުނު ކޮރެއާ އަދި ފަރަންސޭސިވިލާތް ފަދަ ޤައުމުތަކުން މި ބަޔާނުގައި ބައިވެރިވެފައެއް ނުވެއެވެ.
އޭއައި ޞިނާޢަތުގެ އެތެރޭގައި ރައްކާތެރިކަމާ މެދު ބަހުސްތައް ކުރެވެމުންދާއިރު، އެންތްރޮޕިކްގެ ސީއީއޯ ޑާރިއޯ އަމޯޑޭއި އޭއައި ތަރައްޤީކުރުމުގެ ދުވެލި މަޑުޖައްސާލުމަށް ގޮވާލެއްވުމުން، އޯޕަންއޭއައިގެ ސީއީއޯ ސޭމް އޮލްޓްމަން އަދި އީލޮން މަސްކް ވަނީ އެކަމަށް ތާޢީދުކުރައްވާފައެވެ. މިފަދަ ގޮވާލުންތައް އައިސްފައިވަނީ ޖުލައި މަހު އޯޕަންއޭއައިގެ އެޖެންޓުތަކަކުން ހަގިންގ ފޭސް ހެކްކުރުމާ ގުޅިގެން، ރައްކާތެރިކަމުގެ ފިޔަވަޅުތައް ބަލިކަށިވަމުންދާ ކަމަށް އދ. ގެ އެހީތެރިކަން ލިބިފައިވާ ސައިންޓިފިކް ޕެނަލުން ފާހަގަކުރުމާ ގުޅިގެންނެވެ.
އޯޕަންއޭއައި އިން ނެރުނު ބަޔާނެއްގައި، ކުރިއަރާފައިވާ އޭއައިގެ ޓެކްނިކަލް މިންގަނޑުތައް އެކުލަވައިލުމުގައި އެމެރިކާއިން އިސްނަގަންޖެހޭ ކަމަށް ބުނެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިންގ ވައިޓް ހައުސްގައި ބާއްވަވާ ބައްދަލުވުމުގައި ވެސް އޭއައިއާ ގުޅޭގޮތުން މަޝްވަރާކުރައްވާނެ ކަމަށް ބެލެވެއެވެ.
މި ލިޔުން ކިޔާލުމުން
