ރާއްޖެއަށް އައި އެމެރިކާގެ ރައްޔިތެއްގެ ލަގެޖުން ވަޒަން އަޅާފައިވާ މެގަޒިނެއް ފެނުނު މައްސަލައެއް ދިވެހި ފުލުހުންގެ ޚިދުމަތުން ބަލަން ފަށައިފިއެވެ.
މޯލްޑިވްސް ޕޮލިސް ސަރވިސްއިން ނެރުނު ނޫސްބަޔާނުގައިވާ ގޮތުން، މި ތަކެތި ފެނިފައިވަނީ 24 އޮގަސްޓް 2026 ވަނަ ދުވަހު ވެލާނާ އިންޓަރނޭޝަނަލް އެއާޕޯޓުން ކޯބަލް ބްރިޓެއިން ޓައިލަރ (36އ) ކިޔާ އެމެރިކާގެ ރައްޔިތެއްގެ ލަގެޖް ސްކޭން ކުރުމުގެ ތެރޭގައެވެ. ލަގެޖުން ފެނުނު މެގަޒިނާއެކު އެ މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މިއަދު އޭނާގެ ބަންދަށް މުއްދަތު ޖަހަން ކޯޓަށް ގެންދިއުމުން 10 ދުވަހަށް ބަންދު ކުރުމަށް އަމުރުކޮށްފައިވާ ކަމަށްވެސް ފުލުހުން ވިދާޅުވިއެވެ.
ފުލުހުން ބުނެފައިވަނީ، މިއީ ޤައުމީ ސަލާމަތާ ގުޅުންހުރި މުހިންމު މައްސަލައަކަށްވާތީ، އެ ބިދޭސީ މީހާ ރާއްޖެއަށް އެތެރެވި މަގުސަދާއި އަދި އެ ތަކެތި ރާއްޖެއަށް އެތެރެކުރި ގޮތް ދެނެގަތުމަށްޓަކައި ކަމާބެހޭ އިދާރާތަކާ ގުޅިގެން އިތުރަށް ތަހުގީގު ކުރަމުންދާ ކަމަށެވެ.