މި އަހަރުގެ ފަހުކޮޅު އުތުރު ކޮރެއާގެ ލީޑަރު ކިމް ޖޮންގް އުންއާ ބައްދަލުކުރެއްވުމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިޝާރާތަށާއި މަޝްވަރާތައް އަލުން ފެށުމުގެ ހުށަހެޅުމަށް ޕިޔޮންގްޔަންގުން ވަނީ ފިނި އިޖާބައެއް ދީފައެވެ. ޓްރަމްޕްގެ މި ހުށަހެޅުމަކީ ހެޔޮއެދުމުގެ އިޝާރާތެއް ނޫން ކަމަށާއި، ދެ ލީޑަރުންގެ ޒާތީ ގުޅުމާއި ޤައުމީ ސަލާމަތާއި އަސްކަރީ ސިޔާސަތުތަކާ މަސްހުނި ނުކުރެވޭނެ ކަމަށް ކިމްގެ ކޮއްކޯފުޅު ކިމް ޔޯ ޖޮންގް ވަނީ ވިދާޅުވެފައެވެ.
ޕިޔޮންގްޔަންގުން މަޝްވަރާތަކަށް އަވަސްނުގަންނަ މައިގަނޑު ސަބަބުތަކުގެ ތެރޭގައި އެގައުމަކީ ނިއުކްލިއާ ބާރެއްގެ ގޮތުގައި އެމެރިކާއިން ބަލައިގަތުމަށާއި، ދެކޮޅުވެރި ސިޔާސަތުތައް މުޅިން ނައްތާލުމަށް ޝަރުތުކުރުން ހިމެނެއެވެ. މީގެއިތުރުން، ކުރިން އެމެރިކާގެ ދަތިކުރުމުގެ ފިޔަވަޅުތަކަށް ލުއި ހޯދަން ބޭނުންވި ނަމަވެސް، މިހާރު ރަޝިއާއާއި ޗައިނާއާއެކު އޮތް އިގްތިސާދީ އަދި އަސްކަރީ ގުޅުން ވަރުގަދަވުމުން އެމެރިކާގެ އެހީއަށް އޮތް ބޭނުންތެރިކަން ވަނީ ވަރަށް ބޮޑަށް ކުޑަވެފައެވެ.
ޓްރަމްޕްގެ ހުށަހެޅުއްވުމާ ގާތްގަނޑަކަށް އެކުއެކީގައިހެން އުތުރު ކޮރެއާއިން ވަނީ އެ ޤައުމުގެ އިރުމަތީ އައްސޭރިއަށް 10 ބެލިސްޓިކް މިސައިލް ފޮނުވާލައި، އަސްކަރީ ޤާބިލުކަން ދައްކާލާފައެވެ.
މަސްރަޙު ދިރާސާކުރާ ފަރާތްތަކުން ދެކޭގޮތުގައި އުތުރު ކޮރެއާއިން މަޝްވަރާގެ ދޮރު މުޅިން ބަންދެއް ނުކުރެއެވެ. އެ ޤައުމުގެ މައިގަނޑު ބޭނުމަކީ ކުރިއަށް އޮތް ތަނުގައި އެމެރިކާގެ ފަރާތުން ބޮޑެތި ދޫދިނުންތަކެއް ހޯދުމަށް ބާރުއެޅުމެވެ. އަދި މި އަހަރުގެ ފަހުކޮޅު އޮންނަ އެޕެކް ސަމިޓުގެ ހަވާސާގައި ދެ ލީޑަރުން ބައްދަލުވުމުގެ ފުރުޞަތު އަދިވެސް އެބައޮތެވެ.