ބަންގްލަދޭޝްގެ ކޭމްޕްތަކުގައި ހާލުގައި ޖެހިފައި ތިބި ގާތްގަނޑަކަށް 309,000 މީހުންނަކީ ރާޚައިން ސްޓޭޓްގެ ކުރީގެ ރައްޔިތުންކަން މިޔަންމާގެ އަސްކަރީ ސަރުކާރުން ވަނީ ކަށަވަރުކޮށްދީފައެވެ. ނަމަވެސް، އެމީހުން އަނބުރާ ގައުމަށް ގެންދިއުމުގެ މަސައްކަތް ފެށޭނީ ރާޚައިންގެ ސަލާމަތީ ހާލަތު ރަނގަޅުވުމުން ކަމަށް މިޔަންމާގެ ފޮރިން މިނިސްޓްރީން ވަނީ ހާމަކޮށްފައެވެ.
މިޔަންމާގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ބަންގްލަދޭޝުން ހުށަހެޅި 828,824 މީހުންގެ ލިސްޓުގެ ތެރެއިން 308,797 މީހުންނަކީ ރާޚައިންގެ ކުރީގެ ރައްޔިތުންކަން ކަށަވަރުވެފައިވާ ކަމަށެވެ. މީގެ އިތުރުން އެ ލިސްޓުގައި ހިމެނޭ 4,241 މީހުންނަކީ ޓެރަރިސްޓް ހަރަކާތްތަކުގައި ބައިވެރިވެފައިވާ މީހުން ކަމަށް ފާހަގަކުރެވިފައިވާ ކަމަށާއި، އިތުރު 113,507 މީހުންގެ މައުލޫމާތު ކަށަވަރު ނުކުރެވޭ ކަމަށްވެސް އެ ގައުމުން ބުނެއެވެ.
އދ. އިން ބުނާ ގޮތުގައި، 2017 ވަނަ އަހަރު މިޔަންމާގެ ސަލާމަތީ ބާރުތަކުން ދިން ވަރުގަދަ ހަމަލާތަކާ ގުޅިގެން 700،000 އަށް ވުރެ ގިނަ ރޮހިންޔާ މީހުން އަވަށްޓެރި ބަންގްލަދޭޝަށް ހިޖުރަކުރިއެވެ. އަދި މިހާރުވެސް ކަނޑުމަގުންނާއި އެއްގަމުމަގުން ނުރައްކާތެރި ދަތުރުތައް ކޮށް ގިނަ ބަޔަކު ދަނީ އެ ގައުމު ދޫކޮށް ފިލަމުންނެވެ.
މިޔަންމާއިން ބުނާ ގޮތުގައި މީހުން އަނބުރާ ގެންދިއުމަކީ ހަމައެކަނި ބަންގްލަދޭޝްއާ ދެމެދު އޮތް ދެފަރާތުގެ މައްސަލައެކެވެ. ދެ ގައުމުގެ ދެމެދުގައި ތައްޔާރީތައް ވި ނަމަވެސް، 2018 އަދި 2019 ވަނަ އަހަރު ހަމަޖެއްސި އިންތިޒާމުތަކުގެ ދަށުން އެއްވެސް މީހަކު އަނބުރާ ގޮސްފައެއް ނުވެއެވެ. މިޔަންމާގެ އަސްކަރިއްޔާއިން މިހާރު ހަނގުރާމަ ކުރަމުންދަނީ އެ ސަރަހައްދަށް އިތުރު މިނިވަންކަމާއި އިހުތިޔާރުތައް ހޯދުމަށް މަސައްކަތްކުރާ، ރާޚައިންގެ ހަނގުރާމަވެރި ޖަމާއަތެއް ކަމަށްވާ އަރަކާން އާމީއާ ދެކޮޅަށެވެ.
މީގެ އިތުރުން، މެލޭޝިއާއިން ހިމާޔަތް ހޯދަމުންދާ 5,000 ރޮހިންޔާއިން އަނބުރާ ގެންދިއުމަށް މިޔަންމާއިން އެއްބަސްވި ނަމަވެސް، އެމީހުންގެ ފުރާނައަށް ނުރައްކަލެއް އޮތް ނަމަ އެކަން ކުރިއަށް ނުގެންދާނެ ކަމަށް މެލޭޝިއާއިން ވަނީ ބުނެފައެވެ.