ތުރުކީގެ އަންކާރާގައި ބޭއްވި ނޭޓޯ ސަމިޓަށްފަހު، އެމެރިކާގެ ރައީސް ޑޮނަލްޑް ޓްރަމްޕް ދަތުރުކުރެއްވި އެއާ ފޯސް ވަންއިން އެހެން މަތިންދާބޯޓަކަށް ބަދަލުވެވަޑައިގެންނެވިކަން ކަށަވަރުވެއްޖެއެވެ. މިގޮތަށް މަތިންދާބޯޓު ބަދަލުކުރައްވާފައިވަނީ ސީކްރެޓް ސާވިސްއާއި މިލިޓަރީގެ އެންގެވުމުގެ މަތިންނެވެ.
ސީބީއެސް ނިއުސްގެ ރިޕޯޓެއްގައިވާ ގޮތުން، ސަލާމަތީ ފިޔަވަޅުތައް މިގޮތަށް ވަރުގަދަކޮށްފައިވަނީ ރައީސް ޓްރަމްޕް ދަތުރުކުރައްވާ މަތިންދާބޯޓަށް އީރާނުން މިސައިލް ހަމަލާއެއް ދީފާނެކަމުގެ ބިރު އޮތުމާ ގުޅިގެންނެވެ.
މީޑިއާ ރިޕޯޓްތައް ބުނާ ގޮތުގައި، ފުރަތަމަ އެއާ ފޯސް ވަންއަށް އަރާވަޑައިގަތުމަށްފަހު، ޓްރަމްޕް ވަނީ ސިއްރިއްޔާތުގައި ކޭޓަރިން ޓްރަކެއް ބޭނުންކުރައްވައިގެން ކުޑަ ސީ-32އޭ މިލިޓަރީ ޖެޓަކަށް ބަދަލުވެވަޑައިގެންފައެވެ. އެ ވަގުތު އެއާ ފޯސް ވަންގައި ތިބި ނޫސްވެރިންނާއި އޮފިޝަލުންނަށް ރައީސް އެ ބޯޓުގައި ނެތްކަމެއް އެއްގޮތަކަށްވެސް ނޭނގެއެވެ.
ޤަޠަރުން ހަދިޔާކޮށްފައިވާ އަދި ޓްރަމްޕް ތުރުކީއަށް ކުރެއްވި ދަތުރުފުޅުގައި ބޭނުންކުރެއްވި ބޯއިންގް 747-8 މަތިންދާބޯޓުގައި މިސައިލް ދިފާއީ ނިޒާމު ފުރިހަމައަށް ގާއިމުކުރެވިފައި ނެތުމުގެ ސަބަބުން، އެ ބޯޓުގައި އެނބުރި ވަޑައިނުގެންނެވުމަށް ސީކްރެޓް ސާވިސްއިން ރައީސް ޓްރަމްޕަށް އިރުޝާދު ދިނެވެ. ކުޑަ ޖެޓުގައި އިނގިރޭސިވިލާތުގެ މިލިޓަރީ ބޭސްއަކަށް ވަޑައިގަތުމަށްފަހު، ޓްރަމްޕް އެނބުރި އެމެރިކާއަށް ވަޑައިގެންނެވީ އެހެން މަތިންދާބޯޓެއްގައެވެ.