ސަލާމަތީ ސަބަބުތަކަށްޓަކައި ޕާކިސްތާނުގެ ބާރުގެ ދަށުގައިވާ ކަޝްމީރުގެ ހަތް ދާއިރާއެއްގެ ސަރަހައްދީ އިންތިޚާބުގެ ފަހު ބުރުގެ ވޯޓުލުން މުއްދަތެއް ނެތް ގޮތަށް ފަސްކޮށްފިއެވެ. މި ނިންމުން ނިންމާފައިވަނީ އެ ސަރަހައްދުގައި ސަލާމަތީ މަސްރަހު ގޯސްވެ ހަމަނުޖެހުންތައް ހިނގަމުންދާ ދަނޑިވަޅެއްގައެވެ.
މި ސަރަހައްދުގައި ހިންގި ނުރައްކާތެރި މުޒާހަރާތަކާއި ހަމަނުޖެހުންތަކާ ގުޅިގެން ކަމާބެހޭ ފަރާތްތަކުން ވަނީ މަގުތައް ބަންދުކޮށް، އިންޓަނެޓުގެ ޚިދުމަތްވެސް މެދުކަނޑާލާފައެވެ. ޖޮއިންޓް އަވާމީ އެކްޝަން ކޮމިޓީ (ޖޭއޭއޭސީ) އިން ހާމަކޮށްފައިވާ ގޮތުގައި، ރާވަލަކޯޓު ސަރަހައްދުގައި ސެކިއުރިޓީ ބާރުތަކާއި އާންމުންނާއި ދެމެދު ހިންގި ކުރިމަތިލުންތަކުގައި މިހާތަނަށް 30 އަށްވުރެ ގިނަ މީހުން ވަނީ މަރުވެފައެވެ.
މި އިންތިޚާބުގެ ސިޔާސީ މަސްރަހަށް ބަލާއިރު، ވެރިކަން ކުރާ ޕާކިސްތާން މުސްލިމް ލީގު (ޕީއެމްއެލް-އެން) އިން ވަނީ އިންތިހާބުގެ ކުރީގެ ބުރުތަކުގައި ގިނަ ގޮނޑިތަކެއް ކާމިޔާބުކޮށްފައެވެ. ނަމަވެސް އިދިކޮޅު ޕާކިސްތާން ޕީޕަލްސް ޕާޓީ (ޕީޕީޕީ) އިން ދަނީ އިންތިޚާބު އޮޅުވާލާފައިވާ ކަމަށް ތުހުމަތުކުރަމުންނެވެ. އަދި ކުރީގެ ބޮޑުވަޒީރު އިމްރާން ޚާންގެ ޕާޓީ، ޕީޓީއައި އިން ވަނީ މި އިންތިޚާބު މުޅިން ބައިކޮޓްކޮށްފައެވެ.
މީގެ އިތުރުން، އިންޑިއާގެ ބެލުމުގެ ދަށުގައިވާ ކަޝްމީރުގެ ރެފިއުޖީންނަށް ޚާއްޞަކޮށްފައިވާ ގޮނޑިތައް ބޭނުންކޮށްގެން އިސްލާމްއާބާދުން ސިޔާސީ ނުފޫޒު ފޯރުވާ ކަމަށް މުޒާހަރާކުރާ ފަރާތްތަކުން ދަނީ ތުހުމަތުކުރަމުންނެވެ. މި މައްސަލައަކީވެސް މިހާރު ހިނގަމުންދާ ހަމަނުޖެހުންތަކުގެ އެއް ސަބަބު ކަމަށް ރިޕޯޓުތައް ބުނެއެވެ.