އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ސުލްހައިގެ ޕްލޭނަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދެކޮޅު ހައްދަވައިފިއެވެ. 15 ނުކުތާގެ މައްޗަށް އެކުލެވޭ މިޕްލޭނާއިމެދު ނަތަންޔާހޫ ވިދާޅުވީ ފަލަސްތީނުގެ ހަމާސް ޖަމާއަތުން އެއްކޮށް ހަތިޔާރު ބެހެއްޓުމުން ނޫނީ ޣައްޒާގެ އެއްވެސް ސަރަހައްދަކުން އިސްރާއީލު ސިފައިން ފަހަތަށް ނުޖެހޭނެ ކަމަށެވެ.
ޓްރަމްޕްގެ މި ޕްލޭނަށް ހަމާސް ޖަމާއަތުން ރުހުން ދީފައިވާއިރު، މި ޕްލޭންގައި މައިގަނޑު ގޮތެއްގައި ހިމެނެނީ ހަމާސްގެ ބަރު ހަތިޔާރާއި ޓަނަލްތައް ނައްތާލުމަށްފަހު ޣައްޒާ ހިންގުން ފަލަސްތީނުގެ ޓެކްނޮކްރެޓިކް ކޮމިޓީއަކާ ހަވާލުކުރުމެވެ. ނަމަވެސް ނަތަންޔާހޫ ވަނީ މި ހުށަހެޅުމާ މެދު އޭނާގެ ހުރި ކަންބޮޑުވުންތައް ފާޅުކުރައްވާފައެވެ.
ބޮޑުވަޒީރު ނަތަންޔާހޫ ބޭނުންވަނީ ހަމާސްގެ ހުރިހާ ބާވަތެއްގެ ހަތިޔާރެއް އެއްކޮށް ނައްތާލުމަށެވެ. މީގެ އިތުރުން، އޭނާގެ ބޮޑުވަޒީރުކަމުގެ ދައުރުގައި ފަލަސްތީނުގެ މިނިވަން ދައުލަތަކަށް އެއްވެސް ޖާގައެއް ނުދެއްވާނެ ކަމަށް ވެސް އޭނާ ވަނީ ތަކުރާރުކޮށް ވިދާޅުވެފައެވެ.
ޣައްޒާގެ ހަނގުރާމައިގެ ތަފާސްހިސާބުތަކަށް ބަލާއިރު، 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް 73،300 އަށްވުރެ ގިނަ މީހުން ވަނީ މަރުވެފައެވެ. މިއީ ފަހުގެ ތާރީޚެއްގައި އެ ސަރަހައްދުގައި ހިނގި އެންމެ ލޭއޮހޮރުވުން ބޮޑު ކުރިމަތިލުމެވެ.
ޣައްޒާގެ ސިއްހަތާ ބެހޭ ވުޒާރާއިން ހާމަކޮށްފައިވާ ގޮތުގައި، އެންމެ ފަހުން ހަމަލާތައް މެދުކަނޑާލުމަށް އެއްބަސްވި ފަހުން ވެސް އިސްރާއީލުން ދެމުންދާ ހަމަލާތަކުގައި 1،250 މީހުން ވަނީ މަރުވެފައެވެ. މި ހަމަލާތައް ހުއްޓުމެއް ނެތި ކުރިއަށްދާއިރު، ބައިނަލްއަގުވާމީ މުޖުތަމައުން ދަނީ ސުލްހައިގެ މަގަށް ރުޖޫއަވުމަށް ބާރުއަޅަމުންނެވެ.