ވ. ތިނަދޫ ކައުންސިލްގެ ރައީސް ޢަލީ ޝުޖާއު މަގާމަށް އިންތިޚާބުވި ޕާޓީ ބަދަލުކުރުމާ ގުޅިގެން، އޭނާގެ ގޮނޑި ގެއްލިއްޖެ ކަމަށް ލޯކަލް ގަވަމެންޓް އޮތޯރިޓީ އިން ނިންމި މައްސަލަ ސުޕްރީމް ކޯޓަށް ހުށަހެޅުމަށް އެމްޑީޕީން ނިންމައިފިއެވެ.
އެމްޑީޕީގެ ޗެއާޕާސަން، ކުރީގެ ރައީސް މުޙައްމަދު ނަޝީދު ވިދާޅުވި ގޮތުގައި، ޝުޖާއުގެ ގޮނޑީގެ މައްސަލަ އެ ޕާޓީގެ ގާނޫނީ ޓީމުން މިހާރު ދަނީ ދިރާސާ ކުރަމުންނެވެ. އަދި މި ހަފުތާގެ ތެރޭގައި އެ މައްސަލަ ކޯޓަށް ހުށަހެޅޭނެ ކަމަށް ބެލެވޭ ކަމަށްވެސް އޭނާ ވިދާޅުވިއެވެ.
ލާމަރުކަޒީ ގާނޫނުގައިވާ ގޮތުން، ވަކި ސިޔާސީ ޕާޓީއެއްގެ ޓިކެޓުގައި ކައުންސިލަށް އިންތިޚާބުވުމަށްފަހު، އެ ދައުރުގެ ތެރޭގައި އެހެން ޕާޓީއަކަށް ބަދަލުވެއްޖެނަމަ މަގާމު ގެއްލޭނެއެވެ. ޝުޖާއު ކައުންސިލް އިންތިޚާބު ކާމިޔާބު ކުރެއްވީ ދަ ޑިމޮކްރެޓްސް ގެ ޓިކެޓުގައެވެ. ނަމަވެސް، ކައުންސިލްގެ ދައުރު ފެށުނު ފަހުން މިދިޔަ މެއި މަހުގެ 19 ވަނަ ދުވަހު އޭނާ ވަނީ އެމްޑީޕީއާ ގުޅިވަޑައިގެންފައެވެ.
މި މައްސަލާގައި ޝުޖާއު ވިދާޅުވީ، އޭނާ އެމްޑީޕީއާ ގުޅުނީ މިދިޔަ އޭޕްރީލް މަހުގެ 23 ގައި ދަ ޑިމޮކްރެޓްސް އުވާލާފައިވާ ކަމަށް އިލެކްޝަންސް ކޮމިޝަން އިން އެންގުމުން ކަމަށެވެ. އަދި މެއި މަހު މަގާމުގެ ހުވާކުރުމުގެ ކުރިން ޕާޓީ އުވާލާފައިވާތީ، މިއީ އެއް ޕާޓީ ދޫކޮށް އަނެއް ޕާޓީއަށް ބަދަލުވުން ކަމަށް މާނަނުކުރެވޭނެ ކަމަށާއި، މިއީ ގާނޫނުގައި ސާފުކޮށް ބަޔާންކޮށްފައިނެތް ހާލަތެއް ކަމަށް އޭނާ ވަކާލާތު ކުރައްވައެވެ. މީގެ އިތުރުން، ދެން ބާއްވާ އިންތިޚާބެއްގައިވެސް ތިނަދޫ ކައުންސިލްގެ ރައީސްކަން ކާމިޔާބު ކުރާނީ އެމްޑީޕީން ކަމަށް އޭނާ ވިދާޅުވިއެވެ.
އެލްޖީއޭއިން ޝުޖާއުގެ ގޮނޑި ގެއްލުނު ކަމަށް ނިންމުމުގެ ކުރިން، މިދިޔަ މަހުގެ ކުރީކޮޅުން ފެށިގެން އޭނާ ހުރީ ސަސްޕެންޝަންގައެވެ. އަދި އެ މުއްދަތުގައި ކައުންސިލް ހިންގުން އޮތީ ނައިބު ރައީސާ ހަވާލުކޮށްފައެވެ. ސަސްޕެންޝަނާ މެދު ވަކި ގޮތެއް ނިންމުމަށްފަހު، އެލްޖީއޭއިން މިހާރު ވަނީ އޭނާގެ މަގާމު ގެއްލިފައިވާ ކަމަށް ރަސްމީކޮށް ކަނޑައަޅާފައެވެ.