މާލޭގެ ގިނަ އަދަދެއްގެ ރައްޔިތުން މޫދަށް އެރުމަށާއި ހިތްފަސޭހަކޮށްލުމަށް ބޭނުންކުރާ ރަސްފަންނު ސަރަހައްދު މަރާމާތުކުރުމުގެ މަސައްކަތް އެއްކޮށް ނިންމާލުމަށްފަހު، މިއަދު ހެނދުނުން ފެށިގެން އާންމުންނަށް އަލުން ވަނީ ހުޅުވާލާފައެވެ. މިއީ އެ ސަރަހައްދު ދިމާވެފައިވާ އެކި މައްސަލަތަކާ ހެދި މިދިޔަ އޭޕްރީލް މަހުގެ 9 ވަނަ ދުވަހުން ފެށިގެން ބަންދުކޮށްފައި އޮތުމަށްފަހު، ހުޅުވާލި ފުރަތަމަ ފަހަރު ކަމަށް އިމާރާތްކުރުމާއި ބިނާރާ ބެހޭ ވުޒާރާއިން ހާމަކުރެއެވެ.
އެމްޓީސީސީއާ ހަވާލުކޮށްގެން ކުރިއަށްގެންދިޔަ މި މަޝްރޫއުގެ ދަށުން، ރަސްފަންނަށް ދިމާވެފައިވާ ފެން ތަގައްޔަރުވުމުގެ މައްސަލައަށް ވަނީ ދާއިމީ ހައްލެއް ހޯދައިދީފައެވެ. އެގޮތުން އެ ސަރަހައްދުގެ އުތުރު ފަރާތުގައި ހާއްސަ ފެންހިންދާ ނިޒާމެއް ގާއިމުކޮށް، ކުރިން ޖަހާފައިވާ ހިލަތޮށި އެއްކޮށް ނެގުމަށްފަހު، މޫދު ފެން ރަނގަޅަށް ދައުރުވާނެ ފަދަ އޮއިދެމޭ ހޮޅިތަކަކާއެކު އަލުން ވަނީ ހިލަތޮށި ޖަހާފައެވެ. މީގެކުރިން ފެން ދައުރުނުވުމާއި ކައިރީގައި ހުރި ފާހާނާ ހޮޅިތަކުގެ މައްސަލަތަކުގެ އިތުރުން، އެ ސަރަހައްދު ވަރަށް ބޮޑަށް ގިރައިގެން ގޮސް އެތަނުގެ ހަޓުތަކަށާއި އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ވެފައެވެ.
މި ބޮޑު މަރާމާތުގެ މަސައްކަތް ކުރިއަށްދިޔަ މުއްދަތުގައި މާލޭގެ ރައްޔިތުންނާއި އެ ސަރަހައްދު ބޭނުންކުރާ އާންމު ފަރާތްތަކުން ދެއްވި އެއްބާރުލުމާއި ބެހެއްޓެވި ކެތްތެރިކަމަށްޓަކައި މިނިސްޓްރީން ވަނީ ޚާއްސަ ޝުކުރެއް އަދާކޮށްފައެވެ. ގެނެވުނު މި ބަދަލުތަކާއެކު، މިއަދުން ފެށިގެން އާންމުންނަށް ރައްކާތެރިކަމާއެކު އެ ސަރަހައްދު ބޭނުންކުރެވޭނެ އިންތިޒާމު މިހާރު ވަނީ ހަމަޖެހިފައެވެ.