ރާއްޖޭގެ އެއްވެސް އެއާޕޯޓެއް ހިންގަން ބޭރުގެ ބަޔަކަށް ނުދޭނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ. މިނިސްޓަރު މިހެން ވިދާޅުވީ، ހދ. ހަނިމާދޫ އިންޓަނޭޝަނަލް އެއާޕޯޓް ހިންގަން އިންޑިއާގެ އެހީތެރިކަމަށް ދިވެހި ސަރުކާރުން ހުށަހަޅާފައިވާ ކަމަށް ބުނެ އިންޑިއާގެ ނޫހަކުން ރިޕޯޓްކޮށްފައިވާ ދަނޑިވަޅެއްގައެވެ.
އިންޑިއާގެ "ދަ ހިންދޫ" ނޫހުން ރިޕޯޓްކޮށްފައިވާ ގޮތުގައި، އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ތަރައްގީކުރި ހަނިމާދޫ އެއާޕޯޓް މެނޭޖުކުރަން ރައީސް ޑރ. މުހައްމަދު މުއިއްޒު ވަނީ އިންޑިއާއަށް ހުށަހަޅުއްވާފައެވެ. ނަމަވެސް މި ވާހަކަތައް ދޮގުކުރައްވައި އަމީން ވިދާޅުވީ "ރާއްޖޭގެ އެއްވެސް އެއާޕޯޓެއް ހިންގަން ބޭރުގެ ބަޔަކާ މި ސަރުކާރުން ހަވާލު ނުކުރާނެ" ކަމަށެވެ.
މިނިސްޓަރު އިތުރަށް ވިދާޅުވި ގޮތުގައި ރާއްޖޭގެ ހުރިހާ އެއާޕޯޓެއް ހިންގަނީ މޯލްޑިވްސް ސިވިލް އޭވިއޭޝަނުން ހުއްދަ ދީފައިވާ ދިވެހި އޮޕަރޭޓަރުންނެވެ. އަދި އެއާޕޯޓުތައް ހިންގުން އެ ނޫން ގޮތަކަށް ކުރިއަށް ގެންދިއުމަކީ މި ސަރުކާރުގެ ސިޔާސަތެއް ނޫން ކަމުގެ ޔަގީންކަން ވެސް އޭނާ ދެއްވި އެވެ.
"ދަ ހިންދޫ" ނޫހުގައި ބުނެފައިވަނީ އެއާޕޯޓް ހިންގުމާ ގުޅޭ ދިރާސާތައް ހެދުމަށް އިންޑިއާގެ އެއާޕޯޓްސް އޮތޯރިޓީ (އޭއޭއައި) އާ މިހާރު ހަވާލުކޮށްފައިވާ ކަމަށެވެ. އަދި މި ހުށަހެޅުން ހުށަހެޅުއްވީ އިންޑިއާގެ ސިވިލް އޭވިއޭޝަން މިނިސްޓަރު ކޭ. ރާމް މޯހަން ނައިޑޫ ރާއްޖެއަށް ކުރެއްވި ދަތުރުފުޅުގެ ތެރެއިން ކަމަށްވެސް އެ ނޫހުން ބުނެފައިވެއެވެ.
މީގެ ކުރިން ރައީސް މުހައްމަދު ނަޝީދުގެ ވެރިކަމުގައި ވެލާނާ އިންޓަނޭޝަނަލް އެއާޕޯޓް އިންޑިއާގެ ޖީއެމްއާރު ކުންފުންޏާ ހަވާލުކުރުމުން ބޮޑެތި ފާޑުކިޔުންތަކެއް އަމާޒުވެ، ފަހުން އެ އެއްބަސްވުން ވަނީ ބާތިލްކޮށްފައެވެ. އެ ފަހަރު އެއާޕޯޓް އަނބުރާ ސަރުކާރަށް ނެގުމަށް 270 މިލިއަން ޑޮލަރު ބަދަލުގެ ގޮތުގައި ދޭން ޖެހުނެވެ.
އިންޑިއާގެ ނޫހަކުން މިގޮތަށް ރިޕޯޓު ކުރިނަމަވެސް ރާއްޖޭގެ ވައިގެ ބަނދަރުތަކުގެ ކޮންޓްރޯލް ބޭރުގެ އެއްވެސް ފަރާތަކަށް ނުދޭނެ ކަމަށާއި، ހުރިހާ އެއާޕޯޓެއްވެސް ބަލަހައްޓާނީ ދިވެހި ކުންފުނިތަކުން ކަމަށް ސަރުކާރުން ޔަގީންކޮށްދެއެވެ.