ހައި ކޯޓުގެ ފަނޑިޔާރުކަމުގެ މަގާމުގައި ހުންނެވި އަލްއުސްތާޛު މުހައްމަދު ފައިސަލް، އެމަނިކުފާނުގެ މަގާމުން އިސްތިއުފާ ދެއްވައިފި އެވެ.
ފައިސަލް އިސްތިއުފާ ދެއްވީ ހައިކޯޓުގެ އިސް ފަނޑިޔާރުކަމަށް އޭނާ އައްޔަންކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމި ނަމަވެސް އެ މަގާމަށް ފައިސަލް ރަސްމީކޮށް އައްޔަންނުކޮށް، ފަހުން އެހެން ފަނޑިޔާރަކު ވަގުތީގޮތުން ހައިކޯޓު ހިންގުމަށް އައްޔަންކޮށްފައި ވަނިކޮށެވެ. މީގެ އިތުރުން ފައިސަލް ހިމެނޭހެން އެ ކޯޓުގެ ފަސް ފަނޑިޔާރެއްގެ މައްސަލަތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އިންވެސް ވަނީ ބަލަން ފަށާފައެވެ.
އެނގިފައިވާ ގޮތުގައި ޖޭއެސްސީން ބަލަމުންދަނީ ފަނޑިޔާރު މުހައްމަދު ނިޔާޒު، ފަނޑިޔާރު މުހައްމަދު ފައިސަލް، ފަނޑިޔާރު ހުސައިން މަޒީދު، ފަނޑިޔާރު ފާތިމަތު ފަރުހީޒާ އަދި ފަނޑިޔާރު ދީބާނާޒު ފަހުމީގެ މައްސަލަތަކެކެވެ.
ޖޭއެސްސީގެ މިއަހަރުގެ 15 ވަނަ ޖަލްސާގައި، ފަނޑިޔާރު ފައިސަލް އިސް ފަނޑިޔާރުކަމަށް އައްޔަނުކުރެއްވުމަށް ނިންމެވީ، ކުރީގެ އިސް ފަނޑިޔާރު ހުސައިން ޝަހީދު ސުޕްރީމް ކޯޓަށް ބަދަލުކުރެއްވުމާ ގުޅިގެން ހައިކޯޓުގެ އިސް ފަނޑިޔާރުކަމުގެ މަގާމު ހުސްވުމުންނެވެ. ފަނޑިޔާރު ފައިސަލް ވަނީ މީގެ ކުރިން ވެސް މި މަގާމު ވަގުތީގޮތުން ފުރުއްވާފަ އެވެ. އަދި 2025 ވަނަ އަހަރުގެ މާޗު މަހުގެ 19 ވަނަ ދުވަހުން ފެށިގެން، ހައިކޯޓު ހިންގެވުމުގެ ޒިންމާ ވެސް ވަގުތީ ގޮތުން އަދާކުރެއްވީ ފައިސަލް އެވެ.
ފަނޑިޔާރު ފައިސަލްގެ ޚިދުމަތްތައް
ފަނޑިޔާރު ފައިސަލް ހައިކޯޓުގެ ފަނޑިޔާރުކަމަށް އައްޔަނުކުރެވުނީ 2018 ވަނަ އަހަރުގެ ޖުލައި މަހުގަ އެވެ. އޭގެ ކުރިން، 2014 ވަނަ އަހަރުގެ މެއި މަހުން ފެށިގެން އޭނާ ވަނީ ޖޭއެސްސީގެ މެންބަރުކަން އަދާކުރައްވާފަ އެވެ. އަދި އެ އަހަރުގެ ޖުލައި މަހުން ފެށިގެން ހައިކޯޓުގެ ފަނޑިޔާރުކަމަށް ވަޑައިގަތުމާ ހަމައަށް ކޮމިޝަނުގެ ނައިބު ރައީސްގެ މަގާމުވެސް އޭނާ ފުރުއްވާފައިވެ އެވެ.
ފަނޑިޔާރު ފައިސަލްއަކީ ޝަރީއަތާއި ގާނޫނީ ދާއިރާއިން ދިވެހިރާއްޖޭގެ ކޮލެޖް އޮފް އިސްލާމިކް ސްޓަޑީޒްއިން ފުރަތަމަ ޑިގްރީ ހާސިލްކުރައްވާފައިވާ ބޭފުޅެކެވެ. މީގެ އިތުރުން އެސްއެމްއެންއެސް އިކުއިޓީ ޗެމްބަރގައި ގާނޫނީ ވަކީލެއްގެ ހައިސިއްޔަތުން ވެސް އޭނާ ވަނީ މަސައްކަތްކުރައްވާފަ އެވެ.
ފަނޑިޔާރު ފައިސަލް އިސްތިއުފާ ދެއްވުމާއެކު، ހައިކޯޓުގެ ފަނޑިޔާރުންގެ މަގާމުތަކުގެ ތެރެއިން އިތުރު މަގާމެއް ހުސްވީ އެވެ. ކޯޓުތަކުގެ ގާނޫނުގެ 27 ވަނަ މާއްދާގައި ބަޔާންކޮށްފައިވާ ގޮތުން، ހައިކޯޓުގައި އިސް ފަނޑިޔާރާއިއެކު ޖުމްލަ 11 ފަނޑިޔާރުން ތިއްބަވަން ޖެހެ އެވެ. ހައިކޯޓަކީ ދިވެހިރާއްޖޭގެ ދަށު ކޯޓުތަކާއި ޓްރައިބިއުނަލްތަކުން ނިންމާ ނިންމުންތަކުގެ އިސްތިއުނާފުގެ މަރުހަލާ ބަލާ ކޯޓެވެ.