ދައުލަތުގެ އަންނަ އަހަރުގެ ބަޖެޓުގައި ހަރަދު ކުޑަކުރުމަށް އަޅާ ފިޔަވަޅުތަކުގެ ތަފުސީލު ހިމަނާފައި ވެސް ނެތް ކަމަށާއި ސަރުކާރުގެ ހަރަދު ކުޑަކުރުމުގެ ސިޔާސަތު މިހާރު "އިބިލީހުގެ ކައިވެންޏަށް" ވެއްޖެ ކަމަށް ބަޖެޓް ދިރާސާ ކުރާ ކޮމިޓީގައި އޮޑިޓަ ޖެނެރަލް ހުސެއިން ނިޔާޒީ މިއަދު ވިދާޅުވެއްޖެ އެވެ. ރައްޔިތުންގެ މަޖިލިހަށް ހުށަހަޅާފައިވާ އަންނަ އަހަރަށް ލަފާކުރާ ބަޖެޓާ ގުޅޭ ގޮތުން ނިޔާޒީ ވިދާޅުވީ، ސަރުކާރަށް ދަރަނި ކުޑަނުކުރެވެނީ އިންތިހާ އަށް ހަރަދު ބޮޑުވުމުން ކަމަށާއި، މިހާރު ހަރަދު ކުރުން އޮތީ ދެމެހެއްޓެނިވި ގޮތަކަށް ނޫން ކަމަށެވެ.
އޮޑިޓަ ޖެނެރަލް ވަނީ ދައުލަތުގެ ހަރަދުތައް ކުޑަކުރުމުގެ ކަންކަން ފަސްކުރަމުން ގެންދާ ގޮތާމެދު ކަންބޮޑުވުން ފާޅުކުރައްވާފަ އެވެ. އޭނާ ވިދާޅުވީ، "ހަރަދުތައް ކުޑަކުރުމުގެ ސިޔާސަތު މި ހުންނަނީ ސަސްޓެއިނަބަލް ލެވަލެއްގައެއް ނޫން. އަޅުގަނޑުމެން އެންމެންނަށް ވެސް އެކަން އެބަ އެނގޭ. ފަސްކުރަމުން ލަސްކުރަމުން މިދަނީ ކޮންމެ އަހަރަކު ވެސް. ދަމުން ދަމުން ގޮސް އަޅުގަނޑުމެން ކިހާ ހިސާބަކުތޯ ފަސްކުރެވޭނީ؟" އޭނާ އިތުރަށް ވިދާޅުވީ، "ހަރަދު ކުޑަކުރުމުގެ ކަންކަން މިހާރު މިއޮތީ އިބިލީހުގެ ކައިވެންޏަށް ވާގޮތަށް ވެފައި" ކަމަށެވެ. ދައުލަތުގެ ހަރަދު ކުޑަކުރުމުގެ ފިޔަވަޅުތައް އެހެން އަހަރުތަކުގެ ބަޖެޓު ފޮތުގައި ހިމަނާފައި އޮތަސް މި އަހަރު އެ ކަން ފެންނަން ނެތް ކަމަށް ވެސް ނިޔާޒީ ފާހަގަކުރެއްވި އެވެ.
ނިޔާޒީ ވިދާޅުވި ގޮތުގައި، ހަރަދުތައް ކުޑަ ނުކުރާ ނަމަ ދަރަނީގެ ގޮންޖެހުމަށް ލުޔެއް ނުލިބޭނެ އެވެ. އޭގެ ބަދަލުގައި ދަރަނި އިތުރަށް ބޮޑުވަމުން ދާނެ އެވެ. އެހެންކަމުން، އަންނަ އަހަރުގެ ބަޖެޓު މަޖިލިހުން ފާސްކުރާއިރު ވެސް ހަރަދުތައް ކުޑަކުރެވޭނެ އުސޫލުތަކެއް ފިނޭންސް މިނިސްޓްރީން މަޖިލީހަށް ހުށަހަޅަން އެދެން އޭނާ ލަފާދެއްވިއެވެ.
ބަޖެޓުގައި ހިމެނޭ ޕްރޮޖެކްޓްތަކުގެ ތަފުސީލުތައް ދެފުށް ފެންނަ އުސޫލަކުން ހާމަކުރަން ޖެހޭ ކަމަށް ވެސް ނިޔާޒީ ވިދާޅުވި އެވެ. އޭނާ ފާހަގަކުރެއްވި ގޮތުގައި، ބަޖެޓު ފޮތުގައި ޕްރޮޖެކްޓްތަކުގެ ތަފުސީލުތައް ހުރުމަކީ އެންމެ ރަނގަޅު "ބެސްޓް ޕްރެކްޓިސް" އެވެ. "މަޖިލީހުން ބަޖެޓެއް ފާސްކުރައްވާ އިރު ތިބޭފުޅުންނަށް އެކަންކަން [ޕްރޮޖެކްޓްތަކުގެ ތަފްސީލު] ހަމަޖެހިފައި އޮތީ ކިހިނެތްތޯ އެނގުން، އަޅުގަނޑުމެން އޮޑިޓް ކުރާއިރު އެ ލިބޭ. އެހެން ނަމަވެސް، ބަޖެޓު ފޮތުގައެއް ނެތް،" އޮޑިޓަ ޖެނެރަލް ވިދާޅުވި އެވެ.
އޮޑިޓް އޮފީހުން ބަޖެޓާ ގުޅޭ ގޮތުން ދިން ލަފާގައި ވެސް ވަނީ، އަންނަ އަހަރު ބޮޑު ދަރަނި އަދާކުރުމުގެ ޕްލޭނެއް ފިނޭންސް މިނިސްޓްރީގައި އޮތް ނަމަވެސް، އެ ފިޔަވަޅުތަކުން ދަރަނީގެ ޕޯޓްފޯލިއޯ އިތުރުވާނެ ކަމަށެވެ. އެކަން ހައްލުކުރުމަށް މެދުރާސްތާގެ ދަރަނީގެ ސްޓްރެޓެޖީތަކުގައި ކަނޑައަޅާފައިވާ ކަންކަމާ އެއްގޮތަށް އަމަލުކުރުމަށް އޮޑިޓް އޮފީހުން ވަނީ ލަފާދީފަ އެވެ. މީގެ އިތުރުން، ފިސްކަލް ހާލަތު ގޯސްވެ، ބޭރުން ދަރަނި ހޯދުމަށް ދަތިތަކެއް ހުރި އިރު، ޑޮމެސްޓިކް ދަރަންޏަށް ޕްރެޝަރު ބޮޑުވެފައިވާކަން ވެސް އޮޑިޓް އޮފީހުން ފާހަގަކުރި އެވެ.