އަންނަ ފެބުރުވަރީ މަހުގެ 5 އިން 8 އަށް ގދ. ގައްދޫގައި ބޭއްވުމަށް ތާވަލު ކުރެވިފައިވާ ދިވެހި ސަރފް ލީގުގެ މި އަަހރުގެ ފުރަތަމަ މުބާރާތް ކެންސަލް ކުރެވިފައިވާ ކަމަށް މޯލްޑިވްސް ސަރފިންގ އެސޯސިއޭޝަން (އެމްއެސްއޭ) އިން ބުނެފިއެވެ.
އެމްއެސްއޭ އިން ބުނީ މި މުބާރާތް ކެންސަލް ކުރަން ޖެހުނީ، މި މުބާރާތުގެ ހޯސްޓިންގ ޕާޓްނަރ ކަމަށްވާ ގދ. ގައްދޫ ކައުންސިލްގެ އިދާރާގެ މިވަގުތުގެ ހާލު ނިޔާ ކުރާ ގޮތުން، މުބާރާތަށް ކުރިން ދެމުން އައި އެހީތެރިކަން ދިނުމަށް އުޒުރުވެރިވާކަން އެ ޖަމުޢިއްޔާއަށް އެންގުމާ ގުޅިގެން ކަމަށެވެ.
އެމްއެސްއޭ އިން ބުނީ ގައްދޫ ކައުންސިލްގެ އިދާރާއަކީ އެ އެސޯސިއޭޝަނާ ވަރަށް ގާތް ގުޅުމެއް އޮންނަ، ދިވެހި ސަރފް ލީގު ވުޖޫދަށް ގެނައުމުގައި މުހިންމު ބައިވެރިއެއް ކަމަށެވެ. އަދި ވޭތުވެ ދިޔަ އަހަރުތަކުގައި އޮމާންކަމާއި ކާމިޔާބުކަމާ އެކު ކަޅެގަލެކޮޑާ މުބާރާތް ނިންމާލުމުގައި ބޮޑު ހިއްސާއެއް ވާ ފަރާތަކީ އެ ކައުންސިލް ކަމުގައި ފާހަގަކޮށް، އެމްއެސްއޭ އިން ވަނީ ޝުކުރު ދަންނަވައިފައެވެ.
މީގެ އިތުރުން، ކައުންސިލްގެ މާލީ ހާލަތު ރަނގަޅުވެ، 2026 ވަނަ އަހަރުގެ ކަޅެގަލެކޮޑާ މުބާރާތަކީ ކުލަގަދަ އަދި އެހާމެ ފޯރުގަދަ މުބާރާތަކަށް ވެގެންދިއުމަށް އުއްމީދުކުރާ ކަމަށްވެސް އެ އެސޯސިއޭޝަނުން ބުންޏެވެ.
އެމްއެސްއޭ އިން ބުނީ މި މުބާރާތް ކެންސަލްވުމާ ގުޅިގެން ދިވެހި ސަރފް ލީގުގެ ފުރަތަމަ އިވެންޓް ބާއްވާނެ ތަނަކާއި ތާރީޚެއް އިޢުލާންކުރުމުގެ މަސައްކަތް ކުރިއަށްދާ ކަމަށެވެ.
މި ލިޔުން ކިޔާލުމުން
