ކެބިނެޓަށް ގެނައި ބަދަލާއެކު ބިނާރާބެހޭ ވުޒާރާގެ އެއްވެސް ޚިދުމަތަކަށް ބަދަލެއް ނާންނާނެ ކަމުގައި އެ ވުޒާރާއިން ބުނެފިއެވެ.
އެ ވުޒާރާއިން މިއަދު ނެރުނު ނޫސްބަޔާނެއްގައި ބުނެފައިވަނީ އިއްޔެއިން ފެށިގެން ގެދޮރުވެރިކަމާ ބެހޭ މަޝްޜޫޢުތަކުގެ މަސައްކަތްތައް ކުރިއަށްގެންދާނީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ ބެލުމުގެ ދަށުން ކަމަށާއި، އެ ބަދަލާއެކު އެ ވުޒާރާއިން ދެމުންގެންދާ އެއްވެސް ޚިދުމަތަކަށް ބަދަލެއް ނާންނާނެ ކަމަށެވެ.
އަދި، ގެދޮރުވެރިކަމާއި ބެހޭ މަސައްކަތްތަކާ ގުޅޭގޮތުން އެއްވެސް މަޢުލޫމާތެއް ސާފުކުރަން ބޭނުންވާނަމަ، އެ ވުޒާރާގެ ރަސްމީ ފޯނު ނަންބަރު 4004900 ނުވަތަ 4004901 އަށް ގުޅުމަށް އެ ބަޔާނުގައި ވަނީ އެދިފައެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ އިއްޔެ ސަރުކާރުގެ ބައެއް ވުޒާރާތައް އެއްކޮށްލައި، ވުޒާރާތަކަށާއި ކެބިނެޓަށް ބައެއް ބަދަލުތައް ގެނެސްފައެވެ.
މިގޮތުން ހައުސިންގ މިނިސްޓްރީ އާއި އިންފްރާސްޓްރަކްޗަރ މިނިސްޓްރީ އެއްކޮށްލައި، އެ ވުޒާރާގެ ނަން ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އަށް ވަނީ ބަދަލުކޮށްފައެވެ. މި ވުޒާރާގައި ހުންނަވާނީ މިހާރުވެސް ކެބިނެޓުގައި ހުންނެވި ޑރ. ޢަބްދުﷲ މުއްޠަލިބެވެ.
މީގެ އިތުރުން، ފިނޭންސް މިނިސްޓްރި އާއި ޕްލޭނިންގ މިނިސްޓްރީ އެއްކޮށްލައި، މިނިސްޓްރީ އޮފް ފިނޭންސް އެންޑް ޕްލޭނިންގެ ނަމަށް ވަނީ ބަދަލުކޮށްފައެވެ. މި ވުަޒާރާ ހިންގަވާނީ މޫސާ ޒަމީރެވެ.
އަދި، ކުރީގެ ހައުސިންގ މިނިސްޓަރ ޑރ. ޢަލީ ހައިދަރު އަޙްމަދު، ހަޔަރ އެޑިއުކޭޝަން މިނިސްޓްރީ އަށް ބަދަލުކުރައްވައި، ހަޔަރ އެޑިއުކޭޝަން މިނިސްޓަރަކަށް ހުންނެވި ޑރ. މަރްޔަމް މާރިޔާ ވަނީ އެގްރިކަލްޗަރ މިނިސްޓްރީ އަށް ޢައްޔަނުކުރައްވައިފައެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓަކަށް ބަދަލުތަކެއް ގެނައި ދެވަނަ ފަހަރެވެ.
މި ލިޔުން ކިޔާލުމުން
