ރާއްޖޭގެ އެންމެ ބޮޑު އެއް އެސް.އޯ.އީ ، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ތެރޭގައި ހިނގާފައިވާ ބޮޑެތި ކޮރަޕްޝަނުގެ މައްސަލަތަކެއް ފެންމަތިވެފައި ވަނިކޮށް ކުންފުނީގެ ޗެއަރމަން ފިޔަވައި ބޯޑުގެ ހުރިހާ މެމްބަރުން ސަސްޕެންޑް ކޮށް މެނޭޖްމަންޓުގެ ގިނަ މުވައްޒިފުންތަކެއް މިއަދު ވަނީ ވަޒީފާއިން ވަކިކޮށްފައެވެ.
ކުންފުނީގެ 23 އަހަރުވީ ތާރީހުގައި ނުހިނގާފަދަ ބޮޑެތި ކޮރަޕްޝަނުގެ ތުހުމަތުއަމަލުތަކަކާއި ގުޅިގެން ތަހުގީގަށް ފުރުސަތު ދިނުމަށް ކުރީގެ އެމްޑީ އިއްޔެ އިސްތިއުފާ ދެއްވާފައި ވަނިކޮށް، ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ) އިން ވަނީ މިއަދު ކުންފުނީގެ ހުސްވެފައިވާ އެމްޑީ ކަމުގެ މަގާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް އައްޔަން ކުރައްވައިފައެވެ.
މައުރޫފް ޖަމީލަކީ ރާއްޖޭގެ ސިޔާސީ މަސްރަހުގައި އެހާ ހަރަކާތްތެރި ބޭފުޅެއްގެ ގޮތުގައި މިހާރު ނުފެނުނު ނަމަވެސް ހުޅުމާލެ ތަރައްޤީކުރުމުގެ މަސައްކަތުގައި ވަރަށް އިސްކޮށް އުޅުއްވި ފަންނީ ތަޖުރިބާކާރު ބޭފުޅެކެވެ.
ރައީސް މައުމޫންގެ ވެރިކަމުގައި 1997 ވަނަ އަހަރު ފެއްޓެވި ހުޅުމާލެ ހިއްކުމުގެ މަޝްރޫއަކީ ގޯތިގެދޮރުގެ ދަތިކަން ހައްލުކުރުމަށް ރާއްޖޭގައި މިހާތަނަށް ހިންގުނު އެންމެ މުހިންމު މަޝްރޫއެވެ. މި މަޝްރޫއުގެ ސަބަބުން މާލެ ސަރަހައްދު އިތުރަށް ތަރައްގީވެ އިގްތިސާދީ ގޮތުންނާއި އިޖްތިމާއީގޮތުން ރާއްޖެއަށް އަގުނުކުރެވޭ ވަރުގެ ފާއިދާ ތަކެއް މިހައިތަނަށް ވަނީ ލިބިފައެވެ.
ހުޅުމާލެ ހިއްކަން ފެށިއިރުވެސް ކޮންސްޓްރަކްޝަން މިނިސްޓްރީގައި މަސައްކަތްކުރި މައުރޫފް ޖަމީލަކީ އެ މަސައްކަތުގައި އޭރު މިނިސްޓްރީގެ ފަރާތުން އެންމެ އިސްދައުރެއް އަދާކުރެއްވި ފަރާތެވެ.
އޭގެ ފަހުން ހުޅުމާލެ ތަރައްގީ ކުރުމުގެ މަޝްރޫއުގެ މަސައްކަތްތައް ރައީސް އޮފީހުގެ ދަށަށް ބަދަލުކޮށް ހުޅުމާލެ ޑިވެލޮޕްމަންޓް ޔުނިޓް އުފެއްދެވިއިރު އެ ޔުނިޓްގެ އެންމެ އިސްފަރާތަކަށްވެސް ހުންނެވީ މައުރޫފެވެ.
އަދި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ ނަމުގައި ސަރުކާރުން ކުންފުންޏެއް އުފައްދަވައި ހުޅުމާލެ ތަރައްގީ ކުރުމުގެ މަސައްކަތް އެ ކުންފުނީގެ ދަށަށް ބަދަލުކުރިފަހުން ކުންފުނީގެ ސީއީއޯގެ މަގާމުވެސް މައުރޫފް ފުރުއްވި އެވެ.
މައުރޫފް އެޗްޑީސީން ވަކިވެވަޑައިގަތީ ރައީސް މައުމޫންގެ ވެރިކަމުގައި ކޮންސްޓްރަކްޝަން މިނިސްޓަރަކަށް އައްޔަން ކުރެއްވި ހިސާބުންނެވެ.
މައުރޫފް އެޗްޑީސީގެ މެނޭޖިންގ ޑިރެކްޓަރު ކަމުގެ މަގާމަށް އަލުން އައްޔަން ކުރުމުން ގިނަ ބައެއްގެ ތަރުހީބު އެކަމަށް ދަނީ ލިބެމުންނެވެ.
މިކަމާއި ގުޅުވައި ކުރީގެ ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މައުރޫފް ފަދަ ގާބީލު ނަޒާހަތްތެރި އަދި ތަޖުރިބާކާރު ބޭފުޅަކު އެޗްޑީސީ އަށް އައްޔަން ކުރުމުން އެކަމާ އުފާ ކުރައްވާ ކަމުގައެވެ.
Delighted by the appointment of a person of such integrity, ability and experience as Mauroof Jameel as head of HDC. Congratulations and good luck! pic.twitter.com/PbhJJvOosz
— Maumoon Abdul Gayoom (@maumoonagayoom) December 22, 2024
ރައީސް ޑރ. މުހައްމަދު މުއިއްޒު މިއަދު ނޫސްވެރިންނަށް މައުލޫމާތު ދެއްވަމުން ވިދާޅުވީ އެޗްޑީސީގެ މެނޭޖިން ޑިރެކްޓަރަކަށް މިއަދު އައްޔަން ކުރެއްވި މައުރޫފް ޖަމީލަށް ވަރަށް ބޮޑަށް އިތުބާރު ކުރައްވާ ކަމަށާއި ނަޒާހަތްތެރިވާނެ ކަމަށެވެ.
އާކިޓެކްޗަރ ރޮނގުން މަތީ ތައުލީމު ހާސިލުކޮށްފައިވާ މައުރޫފުވަނީ މި ދާއިރާއިން ރާއްޖޭގައި 30 ވަރަކަށް އަހަރު ހިދުމަތްކޮށްފައެވެ. މީގެ އިތުރުން މައުރޫފަކީ ކޮންސްޓްރަކްޝަން ދާއިރާއާ ގުޅޭ ދިރާސާތައް މިހާރުވެސް ކުރައްވާ ބޭފުޅެކެެވެ. މިގޮތުން ބައެއް ދިރާސާތައް ޝާއިއުކުރައްވާފައި ވާއިރު ރާއްޖޭގެ ހިރިގަލުގެ މިސްކިތްތަކާ ގުޅޭގޮތުން ލިޔުއްވާފައިވާ ފޮތް ފާހަގަކުރެވެއެވެ.
ކުރިން ކެބިނެޓްގައި ހިމެނުނު ބޭފުޅަކަށްވިޔަސް މައުރޫފް ފާހަގަކުރެވިފައިވަނީ ރާއްޖޭގެ ހަލަބޮލި ސިޔާސީ މަސްރަހާއި ދުރުކޮށް އުޅުއްވާ ޕްރޮފެޝަނަލް ބޭފުޅެއްގެ ގޮތުގައެވެ. ހުޅުމާލޭ މަޝްރޫއުގެ ފަންނީ އެންމެ ބޮޑު ހިއްސާދާރުގެ ގޮތުގައެވެ.
މި ލިޔުން ކިޔާލުމުން
