ގާނޫނުއަސާސީގެ މުހިންމު ބައެއް މާއްދާތަކަށް އިސްލާހު ގެންނައިރު ރައްޔިތުންގެ ރުހުން އޮތްތޯ ބަލަން ފެންނަ ނުފެންނަ ވޯޓަކަށް އަހަންޖެހޭގޮތަށް އޮންނަ މާއްދާ އެއް ކުރިންވެސް ލިޔެވިފައި އޮވެއެވެ. މިގޮތަށް ލިޔެވިފައި އޮންނަނީ ރައްޔިތުންނާ ވަރަށް ބޮޑަށް ގުޅުން އޮންނަ، އަދި ރައްޔިތުންގެ ހައްގުތައް ކަށަވަރުކުރަން ގާނޫނުއަސާސީގައި ލިޔެވިފައިވާ މާއްދާތައް ރައްޔިތުންގެ ސީދާ ރުހުމެއް ނެތި ބަދަލު ނުކުރެވޭނެ ގޮތަށް ހެދުމުގެ މަގްސަދުގައި ކަމަށް ބެލެވެއެވެ.
ނަމަވެސް އެ ނިޔަތުގައި އެމާއްދާ ލިޔެވިފައި އޮތްކަމުގައި ވީނަމަވެސް ، ރައްޔިތުންގެ ރުހުން އޮތްތޯ ބަލަން ފެންނަ ނުފެންނަ ވޯޓަކަށް އެހުމެއް ނެތި އެ މާއްދާތައް ބަދަލުކުރުމަށް ކުރިން ގާނޫނުއަސާސީ އޮތްގޮތުން އޮތީ ފުރުސަތު ހުޅުވިފައެވެ. އެހެންގޮތަކަށް ދަންނަވާނަމަ ހަރުކަށި އިޖުރާއަތަކުން މެނުވީ ބަދަލުނުކުރެވޭ ގޮތަށް ލިޔެ ހިމާޔަތްދީފައިވާ ކުރިން ނަންގަނެވުނު މާއްދާތައް ބަދަލުކުރެވިދާނެފަދަ ބާގަނޑެއް ކުރިން ގާނޫނުއަސާސީގައި ހުރިކަމަށް ގާނޫނީ ބޭފުޅުން ދެކެވަޑައިގަންނަވައެވެ.
ގާނޫނުއަސާސީގެ 262 ވަނަ މާއްދާގެ (ށ) ކުރިން އޮތްގޮތުން ރައްޔިތުން ރުހޭތޯ ބެލުމަށް ނަގާ ފެންނަ ނުފެންނަ ވޯޓަކަށް އަހަންޖެހެނީ އަސާސީ ހައްގުތަކާއި މިނިވަންކަން ހިމެނޭ ބާބުގެ މާއްދާތަކަށް ބަދަލު ގެންނައިރުގެ އިތުރުން ، ގާނޫނުއަސާސީގެ 79 ވަނަ މާއްދާ އާއި 107 ވަނަ މާއްދާ އާއި 108 ވަނަ މާއްދާއަށް ބަދަލު ގެންނަ ހާލަތުގައެވެ. މި މާއްދާތަކާ ފަސޭހައިން ނުކުޅެވޭގޮތަށް ހެދުމުގެ ބޭނުމުގައި 262 ވަނަ މާއްދާގެ (ށ) ގައި ލިޔެވިފައިވަނީ ، މި މާއްދާތަކަށް އިސްލާހެއް ގެންނަން ރައްޔިތުންގެ މަޖިލީހުން ފާސްކުރާ ބިލެއް ރައީސުލްޖުމްހޫރިއްޔާއަށް ތަސްދީގު ކުރެވޭނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ފެންނަ ނުފެންނަ ވޯޓަކުން އަޣުލަބިއްޔަތު ލިބިއްޖެ ނަމައެވެ. ފެންނަ ނުފެންނަ ވޯޓަކުން ރައްޔިތުން އެކަމާ ދެކޮޅު ހަދައިފިނަމަ އެ ބިލު ބާތިލުވީއެވެ.
މިގޮތަށް ލިޔެވިފައި އޮތްއިރު ، ފާހަނގަކޮށްލަންޖެހޭ އެންމެ މުހިންމު ކަމަކީ ކުރިން ގާނޫނުއަސާސީ އޮތްގޮތުން ވަކި މާއްދާތަކަކަށް ބަދަލުގެނައުމަށް ރައްޔިތުންގެ ރުހުން ހޯދަން ޖެހޭ ކަމަށް އޮންނަ 262 (ށ) އަކީ ގާނޫނު އަސާސީއަށް ބަދަލު ގެނައުމަށް އޮންނަ އާންމު ހާލަތުގައި ބަދަލު ކުރެވޭގޮތަށް އޮތް މާއްދާއެއް ކަމެވެ. އެހެންކަމުން އެ މާއްދާގައި ރައްޔިތުން ރުހޭތޯ ބެލުމަށް ނަގާ ފެންނަ ނުފެންނަ ވޯޓަކަށް އަހަންޖެހޭ ކަމަށް ބުނެފައި އޮތް އިބާރާތް އެނޫން ގޮތަކަށް ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިން ބައިގެ އަޣުލަބިއްޔަތުން ބަދަލު ކުރެވިދާނެއެވެ. އެއީ މިހާރުގެ އަދަދުން 70 މެންބަރުންނެވެ.
މިގޮތަށް މިކަން އޮތުމުން ގާނޫނުއަސާސީގެ މުހިންމު މާއްދާތަކެއްގެ ރައްކާތެރިކަމަށް ހިމެނިފައިވާ މާއްދާއަށް ލިޔެވުނުއިރު ދޭން ބޭނުންވި ރައްކާތެރިކަން އޮތީ ނުލިބިއެވެ. އާންމު ހާލަތުގައި ބަދަލުކުރެވޭ ގޮތަށް އެ މާއްދާ އޮތުމުން އެ މާއްދާގެ ހިމާޔަތުގައި ދެން ހުރި މާއްދާތަކަށް ލިބިފައި އޮތް ރައްކާތެރިކަމެއް ނެތެވެ. ސަބަބަކީ އެ މާއްދާގައި ފެންނަ ނުފެންނަ ވޯޓަކަށް އަހަންޖެހޭ ކަމަށް ބުނެފައި އޮތް އިބާރާތް އެއާ އިދިކޮޅަށް ބަދަލުކުރުމުގެ ފުރުސަތުވެސް އާންމު ހާލަތުގައި އޮތުމެވެ.
ނަމަވެސް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅިގޮތަށް ގާނޫނުއަސާސީގެ 262 ވަނަ މާއްދާގެ (ށ) ގެ ފަހަތަށް ހަތަރު ވަނަ ނަމްބަރެއް މިހާރު ވަނީ އިތުރުކުރެވިފައެވެ. މިގޮތަށް ބަދަލުކުރުމުން ރައްޔިތުންގެ ހިޔާލު ހޯދަން ޖެހޭނެ ކަމަށް ބުނާ 262 ވަނަ މާއްދާ ގެ (ށ) އަށް އެއްވެސް އިސްލާހެއްވެސް ދެން ގެނެވޭނީ ރައްޔިތުންގެ ރުހުން ލިބިގެންނެވެ. މާނައަކީ 262 ވަނަ މާއްދާ ގެ (ށ) އެހެންގޮތަކަށް ބަދަލުކުރުމަށް ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިން ބައިގެ އަޣުލަބިއްޔަތުން ނިންމައިފިނަމަ ، އެކަމަށް ރައްޔިތުންގެ ރުހުން އޮތްތޯ ބަލަން ފެންނަ ނުފެންނަ ވޯޓަކަށް މިހާރު އަހަންޖެހޭނެއެވެ.
ގާނޫނުއަސާސީ އަށް މިއަދު މި ގެނެވުނު ބަދަލުން ދިވެހި ރައްޔިތުންގެ އަސާސީ ހައްގުތަކާއި މިނިވަންކަން ހިމެނޭ މާއްދާތަކާއި ، ރައްޔިތުންގެ މަޖިލީހުގެ އުމުރަށް ބަދަލު ގެނައުމުގެ އިތުރުން ރިޔާސީ ދައުރާއި ރައީސުލްޖުމްހޫރިއްޔާ އިންތިހާބު ކުރާ ގޮތަށް އެއްވެސް ބަދަލެއް ރައްޔިތުންގެ ރުހުމެއްނެތި ގެނައުމުގެ ފުރުސަތު އެއްކޮށް ބަންދުވީއެވެ. ގާނޫނުއަސާސީ އަލަށް ލިޔެވުނުއިރު މި މާއްދާތަކަށް ދޭން ގަސްތުކޮށްފައި އޮތް ރައްކާތެރިކަން ޔަގީންކުރެވުނީ މިއަދު ގެނެވުނު ބަދަލުންނެވެ.
މި ލިޔުން ކިޔާލުމުން
