ވެބް ސީރީޒް ”ސްޓާޑަމް” އަންނަ އަހަރު ގެނެސްދިނުމަށް ހަމަޖެހިފައިވާކަން އިއުލާންކޮށް ނެޓްފްލިކްސްއިން އިއްޔެ ސޯޝަލް މީޑިއާގައި ވަނީ ޕޯސްޓެއް ކޮށްފައެވެ. ނަމަވެސް މި ސީރީޒް ގެނެސްދޭ ވަކި ތާރީޚެއް ހާމަކޮށްފައެއް ނުވެއެވެ.
މި ސީރީޒް އަކީ ބޮލީވުޑްގެ ކިންގް ކަމުގައިވާ ޝާހުރުކް ޚާންގެ ދަރިފުޅު އާރްޔަން ޚާން ޑައިރެކްޓްކޮށް އާރްޔަންގެ މަންމަ ގޯރީ ޚާން ޕްރޮޑިއުސްކޮށް ފައިވާ ސީރީޒްއެކެވެ.
މި ވެބް ސީރީޒް ގެނެސްދިނުމަށް ހަމަޖެހިފައިވަނީ ނެޓްފްލިކްސް އާއި ރެޑް ޗިލީޒް އެންޓަޓައިމަންޓް ގުޅިގެންނެވެ. ގޯރީ ޚާން އަކީ ރެޑް ޗިލީޒް އެންޓަޓައިމަންޓްގެ އެންމެ ވަރުގަދަ އެއް ހިއްސާދާރެވެ.
މި ސީރީޒްގެ މަސައްކަތް މިހާރު ނިމިފައިވާ ކަމަށާއި ކުރިޔަށް އޮތީ ޕޯސްޓް ޕްރޮޑަކްޝަންގެ މަރުހަލާކަން ރިޕޯޓުތަކުން ވަނީ ހާމަކޮށްފައެވެ.
އިންޑިޔާގެ ފިލްމު އިންޑަސްޓްރީގެ ގިނަ ވާހަކަތަކެއްގެ މައްޗަށް ބިނާކޮށް އުފައްދާފައިވާ މި ވެބް ސީރީޒްގެ ކާސްޓުންގެ މައުލޫމާތު ވަނީ ސިއްރުކޮށްފައެވެ. ނަމަވެސް ރަންވީރު ސިންގް އާއި ރަންބީރު ކަޕޫރުގެ އިތުރުން ޝާހުގެ ޚާއްސަ ފެނިލުމެއް މި ވެބް ސީރީޒްއިން ފެނިގެންދާނެއެވެ.
އާރްޔާން އެކްޓަރެއްގެ ގޮތުގައި އިންޑަސްޓްރީއަށް ނެރުމަށް ވަރަށް ގިނަ ފިލްމު ޕްރޮޑިއުސަރުންގެ ހުށަހެޅުންތައް ޝާހުއަށް ހުށަހަޅަމުން އަންނަނިކޮށް އާރްޔާން އިންޑަސްޓްރީއަށް ނިކުންނާނީ ޑައިރެކްޓަރެއްގެ ގޮތުގައިކަން އޭނާ އިއުލާން ކުރީ 2022 ވަނަ އަހަރުއެވެ. އާރްޔަން އެކްޓަރެއްގެ ގޮތުގައި އިންޑަސްޓްރީއަށް ނެރުމަށް މިހާރުވެސް ޝާހުއަށް އަންނަނީ ގިނަ ހުށަހެޅުންތަކެއް ލިބެމުންނެވެ.
މި ލިޔުން ކިޔާލުމުން
