އިނގިރޭސި ޕްރިމިއާ ލީގުގައި ބްރޫނޯ ގިމާރާއިސް އަދި ބުކަޔޯ ސަކާ ޖެހި ލަނޑުތަކާއެކު، 10 ކުޅުންތެރިންނާއެކު މެޗު ނިންމާލި ސަންޑަލޭންޑްގެ މައްޗަށް 2-0 އިން ކުރިހޯދައި، ލީގުގައި ސައްތައިން ސައްތަ ރެކޯޑެއް އާސެނަލް އިން ދަމަހައްޓައިފިއެވެ. މި މޮޅާއެކު އާސެނަލް ވަނީ ކުޅުނު ހުރިހާ މެޗަކުން މޮޅުވެ ލިބުނު 12 ޕޮއިންޓާއެކު މެންޗެސްޓާ ސިޓީ ފަހަތަށް ޖައްސާލައި ތާވަލުގެ އެއްވަނައަށް ޖެހިލާފައެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރި ނިއުކާސަލް ޔުނައިޓެޑްގެ ކުރީގެ މިޑްފީލްޑަރު ގިމާރާއިސް ވަނީ، ސަންޑަލޭންޑް ސަޕޯޓަރުންގެ ފުރައްސާރައާ ކުރިމަތިލަމުން މެޗުގެ 58 ވަނަ މިނެޓުގައި މޮޅު ގޯލެއް ޖަހައިދީފައެވެ. ގޯލުގެ މަތީ ކަނަށް ފޮނުވާލި މި ހިތްގައިމު ލަނޑަކީ އާސެނަލްގެ ޖާޒީގައި ގިމާރާއިސް ކާމިޔާބުކުރި ފުރަތަމަ ލަނޑެވެ.
އެޒްރީ ކޮންސާ ކުރި ފައުލަކާ ގުޅިގެން ސަންޑަލޭންޑަށް ލިބުނު ޕެނަލްޓީ އެންޒޯ ލެ ފީ ފޮނުވާލުމުން، ކީޕަރު ޑޭވިޑް ރާޔާ ވަނީ ހުޝިޔާރުކަމާއެކު ދިފާއުކޮށްފައެވެ. ގިމާރާއިސްގެ ލަނޑު ފެނިގެންދިޔައީ މި ޕެނަލްޓީ ދިފާއުކުރިތާ އެންމެ 121 ސިކުންތު ފަހުންނެވެ.
މެޗުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނުއިރު، ޒަކާ ނަގައިދިން ބޯޅަތަކުން ބަލާޑް އަދި މުކިއެލޭ ފޮނުވާލި ހަމަލާތަކާއި މިއުނިއޭގެ ހަމަލާތައް އާސެނަލްގެ ޑިފެންސާއި ކީޕަރު ރާޔާ ވަނީ ހުއްޓުވާފައެވެ. އަނެއްކޮޅުން ކައި ހަވާޓްޒްއަށް ލިބުނު ފުރުސަތުތައް ބޭކާރުވިއިރު، ޓިމްބާ ޖެހި ލަނޑު ވަނީ އޮފްސައިޑް ކަމަށް ނިންމާފައެވެ.
މެޗުގެ އިތުރު ވަގުތުގައި ސަކާއަށް ކުރި ފައުލަކާ ގުޅިގެން ސަންޑަލޭންޑްގެ ރެއިނިލްޑޯ މަންޑާވާއަށް ރަތް ކާޑު ދެއްކިއިރު، އެ ފައުލުން ލިބުނު ޕެނަލްޓީ ކާމިޔާބުކޮށް ސަކާ ވަނީ އާސެނަލަށް މޮޅު ކަށަވަރުކޮށްދީފައެވެ. މި މެޗުން ބަލިވި ސަންޑަލޭންޑް އޮތީ ހަތަރު ޕޮއިންޓާއެކު ތާވަލުގެ 14 ވަނައިގައެވެ.
