އިނގިރޭސި ޕްރިމިއާ ލީގުގައި ލިވަޕޫލްގެ އެންފީލްޑް ދަނޑުގައި ކުޅުނު މެޗު 0-0 އިން އެއްވަރުވެ، ފުލަމް އިން ވަރުގަދަ ކުޅުމަކަށްފަހު މުހިންމު ޕޮއިންޓެއް ހޯދައިފިއެވެ. މިއީ ކޯޗު އަލްވާރޯ އަރްބެލޮއާގެ އިރުޝާދުގެ ދަށުން ފުލަމް އަށް ލީގުގައި ލިބުނު ފުރަތަމަ ޕޮއިންޓެވެ.
މެޗުގެ ފުރަތަމަ ހާފުގައި ފުލަމް އިން ވަނީ ނުރައްކާތެރި ހަމަލާތަކެއް އުފައްދައި، ލަނޑު ޖަހާނެ ރަނގަޅު ފުރުސަތުތަކެއް ހޯދާފައެވެ. އެގޮތުން ލިވަޕޫލްގެ ގޯހަކުން ގޮންޒާލޯ ގާސިއާ ފޮނުވާލި ބޯޅައެއް ޖެރެމީ ޖެކުއެޓް ގޯލުގެ ރޮނގުމަތިން ސަލާމަތްކުރިއިރު، ޖޯޝް ކިންގް އަދި އެންޓަނީ ރޮބިންސަން ފޮނުވާލި ހަމަލާތައްވެސް ފާހަގަކޮށްލެވުނެވެ.
ލިވަޕޫލްގެ ފަރާތުން ވިކްޓަ މުނޯޒް އާއި ބްރެޑްލީ ބާކޯލާ ލަނޑު ޖަހަން ކުރި މަސައްކަތްތައް ފުލަމްގެ ކީޕަރާއި ޑިފެންޑަރުން ވަނީ ހުއްޓުވާފައެވެ.
ދެވަނަ ހާފުގައި ލިވަޕޫލުން ބަދަލުތަކެއް ގެނެސް، އެލެކްސެންޑަ އިސާކް އަދި ޑޮމިނިކް ސޮބޮސްލާއި މެދުވެރިކޮށް ހަމަލާތަކެއް ފޮނުވާލި ނަމަވެސް ފުލަމްގެ ކީޕަރު ބާންޑް ލެނޯ ވަނީ އެ ހަމަލާތައް ދިފާއުކޮށްފައެވެ.
ދެ ޓީމަށްވެސް ލަނޑެއް ނުޖެހި މެޗު ނިމުނުއިރު، މިއީ ވިދިވިދިގެން ތިން މެޗުން ބަލިވެފައިވާ ފުލަމްއަށް ލިބުނު ވަރަށް މުހިންމު ޕޮއިންޓެކެވެ.
