ސަޕްލިމެންޓަރީ ބަޖެޓްގެ ގޮތުގައި 5.1 ބިލިއަން ރުފިޔާ ފާސްކުރަން ކޮމިޓީން މިއަދު ނިންމާފިއެވެ.
ފާސްކުރެވުނު މި ބަޖެޓް މަޖިލީހަށް ފޮނުވައި ބަހުސްކުރުމަށްފަހު މަޖިލީހުން ގޮތެއް ނިންމާނެއެވެ.
މި ބަޖެޓާއެކު ޑެފިސިޓް ބަޖެޓު 18 ބިލިއަން ރުފިޔާއަށް އިތުރުވާނެއެވެ. އަދި މި އަހަރުގެ ޖުމްލަ ބަޖެޓް 55 ބިލިއަން ރުފިޔާއަށް އަރާނެއެވެ.
ބޭރުގެ އެހީގެ ގޮތުގައި 1.4 ބިލިއަން ރުފިޔާ އަދި ޑޮމެސްޓިކް މާކެޓުން 3 ބިލިއަން ރުފިޔާ ހޯދުމަށް ސަޕްލިމެންޓަރީ ބަޖެޓުގައި ކަނޑައަޅާފައިވެއެވެ.
ސަޕްލިމެންޓްރީ ބަޖެޓުގެ މުހިއްމު ބައިތައް:
- ޕީއެސްއައިޕީ: ދެ ބިލިއަން ރުފިޔާ
- - ސަބްސިޑީ: އެއް ބިލިއަން ރުފިޔާ
- - ކޮންޓިންޖެންސީ ބަޖެޓު: 650 މިލިއަން ރުފިޔާ
- - ސްޓޫޑެންޑް ލޯނު: 458 މިލިއަން ރުފިޔާ
- - ސަރުކާރު ހިއްސާވާ ކުންފުނިތައް: 441 މިލިއަން ރުފިޔާ
- - އެންސްޕާ: 263 މިލިއަން ރުފިޔާ - މެޑިކަލް ކޮންޒިއުމަބަލްސް: 200 މިލިއަން ރުފިޔާ
- - މުސާރަ: 24 މިލިއަން ރުފިޔާ
އެންމެ ބޮޑު ހޭދައެއް ކުރުމަށް ސަޕްލިމެންޓަރީ ބަޖެޓުގައި ކަނޑައަޅާފައިވަނީ ޕީއެސްއައިޕީ ޕްރޮޖެކްޓްތަކަށެވެ. ދެވަަނައަށް އެންމެ ބޮޑު ބަޖެޓެއް ކަނޑައަޅާފައިވަނީ ސަބްސިޑީއަށެވެ. ސަބްސިޑީގެ ތެރޭގައި ހިމެނެނީ ތެޔޮ، ކާޑު، ކަރަންޓާއި ނަރުދަމާ އާއި ފެނުގެ ޚިދުމަތްތަކެވެ.
މި އަހަރުގެ ބަޖެޓުގެ ގާތްގަނޑަކަށް 70 ޕަސެންޓު ހޭދަކުރަނީ ރިކަރަންޓް ޚަރަދުތަކަށެވެ. ސަޕްލިމެންޓްރީ ބަޖެޓާއެކު ޖުމްލަ ރިކަރަންޓް ހަރަދު 36.4 ބިލިއަން ރުފިޔާއަށް އަރާނެއެވެ. އަދި ކެޕިޓަލް ހަރަދު ނުވަތަ ޕްރޮޖެކްޓްތަކަށް ކުރާ ހޭދަ 15 ބިލިއަން ރުފިޔާއިން 19 ބިލިއަން ރުފިޔާ އަށް އިތުރުވާނެއެވެ.
