ލުބްނާނުގައި އިސްރާއީލާއި ހިޒްބުاللهގެ ހަނގުރާމަވެރިންނާ ދެމެދު ހިނގަމުންދާ ހަމަނުޖެހުންތައް ވަރަށް ބޮޑަށް އިތުރުވެ، ސަރަހައްދީ ހަނގުރާމައެއްގެ ނުރައްކާ ބޮޑުވެފައިވާ ދަނޑިވަޅެއްގައި، އެމެރިކާއިން މެދުއިރުމައްޗަށް އިތުރު ސިފައިން ފޮނުވަން ނިންމާފައިވާ ކަމަށް ޕެންޓަގަން އިން ބުނެފި އެވެ.
ޕެންޓަގަންގެ ޕްރެސް ސެކްރެޓަރީ މޭޖަރ ޖެނެރަލް ޕެޓް ރައިޑަރ މެދު އިރުމައްޗަށް ފޮނުވަން ނިންމާފައި ވަނީ ކިތައް ސިފައިންތޯ ނުވަތަ އެމީހުންނާ ހަވާލުކުރާނީ ކޮން ކަމެއްކަމެއް ހާމައެއް ނުކުރައްވައެވެ. ގާތްގަނޑަކަށް އެމެރިކާގެ 40،000 ސިފައިން މިވަގުތު މެދު އިރުމަތީގައި އެބަތިއްބެވެ.
އެމެރިކާއިން އިތުރު ސިފައިން ފޮނުވަން ނިންމާފައި މިވަނީ ލުބުނާނުގެ އެތެރޭގެ ބައެއް ސަރަހައްދުތަކަށް އިސްރާއީލު ސިފައިން ދިން ވަރުގަދަ ހަމަލާތަކުގައި އެތައް ސަތޭކަ ބަޔަކު މަރުވެ، އިޒްރޭލުން އިތުރު އޮޕަރޭޝަންތައް ހިންގުމަށް ތައްޔާރުވަމުން ދަނިކޮށެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ލުބުނާނުގެ ރައްޔިތުންނަށް ފޮނުވި މެސެޖެއްގައި ބުނެފައިވަނީ، ހަނގުރާމަ ކުރަނީ ލުބުނާނުގެ ރައްޔިތުންނާ ނޫން ކަމަށާއި، މި ހަނގުރާމައަކީ އިސްރާއީލާއި ހިޒްބުاللهއާ ދެމެދުގައި ކުރެވޭ ހަނގުރާމައެއް ކަމެވެ. އަދި ހިޒްބުالله އިން ގެތަކާއި ގަރާޖުތަކުގައި ހަތިޔާރު ރައްކާކުރާ ކަމަށްވެސް މި މެސެޖުގައި ނަތަންޔަހޫ ބުންޏެވެ.
އިސްރާއީލުން ޣައްޒާއާ ދެކޮޅަށް ފެށި ހަނގުރާމަ ފެށުނީއްސުރެ ހިޒްބުالله އާއި އިސްރާއީލުން ދަނީ ބޯޑަރު ހުރަސްކޮށް ހަމަލާތައް ބަދަލުކުރަމުންނެވެ. ފާއިތުވެދިޔަ އަހަރުގެ އޮކްޓޯބަރު މަހުގައި ފެށުނު މި ހަނގުރާމައިގައި ފަލަސްތީނުގެ 41،400 އަށްވުރެ ގިނަ ރައްޔިތުން ވަނީ ޝަހީދުވެފައެވެ، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
