ދުނިޔޭގެ ބާޒާރުގައި ސާފުނުކުރާ ތެލާއި ޕެޓްރޯލިއަމް އުފެއްދުންތަކުގެ ސަޕްލައި އަދިވެސް ހަނގުރާމައިގެ ކުރީގެ މިންވަރަށް ވުރެ ވަރަށް ބޮޑަށް ދަށުގައިވާ ކަމަށް އައިއީއޭގެ ކުރީގެ އޮފިޝަލް ނީލް އެޓްކިންސަން ވިދާޅުވެއްޖެއެވެ. ޖީ7 ގެ ގައުމުތަކުން ތެޔޮ ދޫކުރި ނަމަވެސް މިއީ ސަޕްލައި ދަށްވުމުގެ އަސާސީ މައްސަލައަށް ލިބޭ ހައްލެއް ނޫން ކަމަށް އޭނާ ފާހަގަކުރެއްވިއެވެ.
ޑީސަލްގެ ސަޕްލައި ދަށްވުމުގެ މައިގަނޑު ސަބަބުތަކުގެ ގޮތުގައި އޭނާ ފާހަގަކުރެއްވީ ޔޫރަޕަށް މެދުއިރުމަތިން ޑީސަލް ނުލިބުމާއި، ހަމަލާތަކާ ގުޅިގެން ރަޝިޔާއިން ޑީސަލް އެކްސްޕޯޓްކުރުން ހުއްޓާލުމުގެ އިތުރުން ޗައިނާއިން ވެސް އެކްސްޕޯޓް ނުކުރުމެވެ.
ދަނޑުވެރިކަމުގެ ސީޒަނާ އެކު ކުރިއަށް އޮތް ތަނުގައި ވެސް ޑީސަލްގެ ޑިމާންޑް މަތީގައި ދެމިއޮންނާނެތީ، ޑީސަލް ބޭނުންކުރާ ދާއިރާތަކަށް ހާއްސަ ސަމާލުކަމެއް ދޭންޖެހޭ ކަމަށް ވެސް އޭނާ ވިދާޅުވިއެވެ.
