ދިވެހިރާއްޖެއާއި ޕާކިސްތާނާ ދެމެދު އޮތް ޚާރިޖީ ގުޅުމަށް 60 އަހަރު ފުރުން ފާހަގަކުރުމުގެ ގޮތުން، ކެންސާ ސޮސައިޓީ އޮފް މޯލްޑިވްސް (ސީއެސްއެމް) އިން ފ. އަތޮޅަށް އަމާޒުކޮށްގެން ކެންސަރަށް ހޭލުންތެރިކުރުމާއި ސްކްރީން ކުރުމުގެ ޕްރޮގްރާމެއް ކުރިއަށްގެންގޮސްފިއެވެ.
މުޅި ފ. އަތޮޅަށް ހުޅުވާލައިގެން ކުރިއަށްގެންދިޔަ މި ޕްރޮގްރާމްގެ ތެރެއިން އުރަމަތީގެ ކެންސަރު، އަނގަޔާއި ކަރުތެރޭގެ ކެންސަރު، ރަހިމުގެ ދޮރަށް ޖެހޭ ކެންސަރު، ޕްރޮސްޓޭޓް ކެންސަރު އަދި ކޮލޮރެކްޓަލް ކެންސަރަށް ސްކްރީންކުރުން ވަނީ ކުރިއަށް ދިޔައެވެ. އެގޮތުން ފ. އަތޮޅު ހޮސްޕިޓަލުގައި ކުރިއަށްދިޔަ ސެޝަންތަކުގައި ނިލަންދޫ، މަގޫދޫ އަދި ދަރަނބޫދޫ ހިމެނޭހެން ޖުމްލަ 910 މީހުން ސްކްރީންކޮށްފައިވާއިރު، ފ. ބިލެތްދޫ ސިއްހީ މަރުކަޒުގައި ބިލެތްދޫ އަދި ފީއަލިން 347 މީހުން ވަނީ ސްކްރީންކޮށްފައެވެ. މީގެ އިތުރުން، އެ 5 ރަށުގެ ބޮޑެތި މީހުންނަށާއި ދަރިވަރުންނަށް އަމާޒުކޮށްގެން ކެންސަރަށް ހޭލުންތެރިކުރުމުގެ ސެޝަންތަކެއްވެސް ވަނީ ބޭއްވިފައެވެ.
ޕާކިސްތާނު ހައިކޮމިޝަނުން ސްޕޮންސާކޮށްގެން މި މަހުގެ 19 އިން 22 އަށް ކުރިއަށްގެންދިޔަ މި ކެމްޕޭން ފ. ނިލަންދޫގައި ރަސްމީކޮށް އިފްތިތާޙު ކޮށްދެއްވީ ޕާކިސްތާނުން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު، ވައިސް އެޑްމިރަލް (ރިޓަޔަޑް) ފައިޞަލް ރަސޫލް ލޯދީއެވެ.
މި ޕްރޮގްރާމް އިފްތިތާހުކުރުމުގެ ރަސްމިއްޔާތުގައި ސީއެސްއެމްގެ ރައީސް ޙުސައިން ރަޝީދު މޫސާ އަދި ފ. އަތޮޅު ކައުންސިލްގެ ރައީސް ޢަލީ އަޙްމަދު ވަނީ ޕާކިސްތާނު ސަރުކާރަށާއި ރައްޔިތުންނަށް ޝުކުރު އަދާކުރައްވައި، ދެ ޤައުމުގެ ދެމެދުގައި އޮތް ތާރީޚީ އެކުވެރިކަމުގެ މައްޗަށް އަލިއަޅުއްވާލައްވާފައެވެ. އަދި ސީއެސްއެމްގެ ޗެއާޕާސަން ޖުވައިރިޔާ ސަޢީދު ވަނީ ސްކްރީނިން މަރުޙަލާތައް ކުރިއަށްދާ ގޮތާއި، މީގެ ސަބަބުން އާންމުންގެ ސިއްހަތަށް ކުރާނެ ފައިދާތަކުގެ ތަފްސީލު ދެއްވާފައެވެ.
ޕާކިސްތާނުގެ ހައިކޮމިޝަނަރުގެ ވާހަކަފުޅުގައި، ސީއެސްއެމްއިން ރާއްޖޭގެ އެކި ކަންކޮޅުތަކުގައި ކުރިއަށްގެންދާ އަގުހުރި އިޖުތިމާޢީ މަސައްކަތްތަކަށް ތަޢުރީފު ކުރެއްވިއެވެ. އަދި ރަށްރަށުގެ ސިއްހީ ޚިދުމަތްތައް ހަރުދަނާކުރުމަށް މިފަދަ ހަރަކާތްތައް މުހިންމުކަން ފާހަގަކުރައްވައި، މިއީ ދެ ޤައުމުގެ ރައްޔިތުންގެ ގުޅުން އިތުރަށް ބަދަހިވެގެންދާނެ ކަމެއް ކަމަށް ވިދާޅުވިއެވެ.
ނިލަންދޫއަށް ކުރެއްވި މި ދަތުރުފުޅުގެ ތެރެއިން ހައިކޮމިޝަނަރާއި އިސް އޮފިޝަލުން ވަނީ ފ. އަތޮޅު ހޮސްޕިޓަލުގެ ޑޮކްޓަރުންނާ ބައްދަލުކުރައްވާފައެވެ. މީގެ އިތުރުން ފ. އަތޮޅު ތަޢުލީމީ މަރުކަޒަށް ޒިޔާރަތްކުރައްވައި، ތަޢުލީމީ ދާއިރާއިން އެއްބާރުލުން ދެވިދާނެ ދާއިރާތަކާ ގުޅޭގޮތުން ވެސް މަޝްވަރާ ކުރެއްވިއެވެ.
ސީއެސްއެމްއަކީ މުޅި ރާއްޖެއަށް އަމާޒުކޮށްގެން ކެންސަރަށް ހޭލުންތެރިކުރުމާއި، ބަލި ދެނެގަތުމަށް ސްކްރީން ކުރުމުގެ ޕްރޮގްރާމްތައް ޤައުމީ ފެންވަރުގައި ހިންގަމުން އަންނަ އަމިއްލަ ޖަމްޢިއްޔާއެކެވެ.