މިއީ 18 އަހަރާއި 30 އަހަރާ ދެމެދުގެ ޒުވާނުން އަލަށް ފަށާ ނުވަތަ ކުރިއަރުވަން ބޭނުންވާ ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް ތައާރަފުކުރި ފެސިލިޓީއެކެވެ. މި ފެސިލިޓީގެ ދަށުން އެއްވެސް ރަހުނަކާ ނުލައި 150,000 ރުފިޔާއާ ހަމައަށް ފައިނޭންސިން ވަނީ ދޫކޮށްފައެވެ.
މި އިސްނެގުމަށް ޒުވާނުންގެ ބޮޑު ތަރުހީބެއް ލިބުމާ ގުޅިގެން ބީއެމްއެލްގެ ސީއީއޯ އަދި މެނޭޖިން ޑައިރެކްޓާ މުހައްމަދު ޝަރީފް އާއި އެސްއެމްއީ ޑިޖިޓަލްގެ ސީއީއޯ ބަދުރުއްދީން ހަސަން ވަނީ، އުފެއްދުންތެރި ހިޔާލުތައް ހުރި ޒުވާން ވިޔަފާރިވެރިން ބިނާކުރުމަށް މާލީ އެހީތެރިކަން ފޯރުކޮށްދެވުމަކީ ލިބޭ ބޮޑު އުފަލަކާއި ފަހުރެއްގެ ގޮތުގައި ފާހަގަކުރައްވާފައެވެ.
މާލީ އެހީގެ އިތުރުން ވިޔަފާރިތައް ދެމެހެއްޓެނިވި ގޮތެއްގައި ކުރިއެރުވުމަށްޓަކައި، އެސްއެމްއީ ޑިޖިޓަލް އިން ވަނީ ބިޒްނަސް ސެންޓާ ކޯޕަރޭޝަން އާ ގުޅިގެން، ފައިނޭންސިން ލިބުނު ފަރާތްތަކަށް މެންޓާޝިޕާއި، ވިޔަފާރީގެ ތަމްރީނު އަދި ފޯމަލައިޒްކުރުމުގެ އެހީތެރިކަން ފޯރުކޮށްދިނުމަށް ނިންމާފައެވެ. އެކި ފިޔަވަހިތަކަށް ބަހާލައިގެން ކުރިއަށްދާ މި ޕްރޮގްރާމުގެ ދެވަނަ ފިޔަވަހީގެ އެޕްލިކޭޝަން ހުށަހެޅުން މިއަހަރުގެ ނޮވެމްބަރު މަހު ހުޅުވާލުމަށް ވަނީ ހަމަޖެހިފައެވެ.
