އީރާނުގެ ހަރުކަށި ފިކުރުގެ މެންބަރުންގެ އަޣުލަބިއްޔަތު އޮންނަ ޕާލަމެންޓުން ބޭރުގެ ނުފޫޒުތައް ހުއްޓުވުމުގެ ނަމުގައި ހުށަހެޅި ޕްލޭނެއްގެ މައިގަނޑު ބައިތައް ފާސްކުރުމާ ގުޅިގެން ގިނަ ކަންބޮޑުވުންތަކެއް ވަނީ އުފެދިފައެވެ. މި ޕްލޭންގެ މައިގަނޑު އަމާޒަކީ ތައުލީމީ، އެކަޑެމިކް، މީޑިއާ އަދި ސަގާފީ ދާއިރާތަކެވެ.
އިސްލާހުކުރެވިފައިވާ 33 މާއްދާގެ މައްޗަށް އެކުލެވޭ މި ބިލުގެ ދަށުން ޔުނިވަރސިޓީތަކާއި އެމްބަސީތަކާ ގުޅުން ބޭއްވުމަށާއި، ބޭރުގެ މީޑިއާތަކަށް މައުލޫމާތު ދިނުމުގައި ހާއްސަ ހުއްދައެއް ހޯދުން މަޖުބޫރުވާނެއެވެ. މީގެ އިތުރުން ޝާއިއުކުރުމާއި، ތަފާސްހިސާބާއި، ސްކޮލަރޝިޕް އަދި ސައިންޓިފިކް އެއްބާރުލުން ފަދަ ކަންކަން ކޮންޓްރޯލް ކުރެވިގެންދާނެއެވެ.
މި ގާނޫނުގެ ދަށުން ގައުމުތައް ތިން ދަރަޖައަކަށް ގިންތިކުރެވޭއިރު، އެމެރިކާ އަދި އިސްރާއީލު ހިމެނެނީ އެންމެ މަތީ ދަރަޖައިގައެވެ. ބޭރުގެ ފަރާތްތަކާ ގުޅުންހުރި ކަންކަން ރަޖިސްޓްރީ ކުރުމަށް ހާއްސަ ޕޯޓަލެއް ގާއިމުކުރަން ޖެހޭއިރު، ހުއްދަނެތި މައުލޫމާތު ބަދަލުކުރުމާއި ހަރަކާތްތައް ހިންގުމަކީ ބޮޑެތި އަދަބުތައް ކަނޑައެޅިފައިވާ ކަންކަމެވެ.
މީގެ އިތުރުން، ބޭރުގެ މީޑިއާތަކަށް މައުލޫމާތު ދިނުމާއި އެއްބާރުލުން ދިނުމަށް ހުއްދަ ހޯދުން މަޖުބޫރުވާނެއެވެ. އަދި ދުޝްމަނު މީޑިއާތަކަށް އިންޓަވިއު ދިނުން މަނާކޮށް، ގައުމީ ސަލާމަތަށް ގެއްލުންވާ ފަދަ މައުލޫމާތާއި ލަފާ ދޭ ފަރާތްތަކަށް 30 އަހަރުގެ ޖަލު ހުކުމެއް ކަނޑައެޅިދާނެ ކަމަށް ބަޔާންކޮށްފައިވެއެވެ.
ފަންނާއި ސަގާފަތުގެ ދާއިރާއިންވެސް ދީނީ ގަވާއިދުތަކާ މެދު ސުވާލު އުފައްދާ ނުވަތަ އިސްލާމްދީނާ ހިލާފު ކަންކަން ކުރިއަރުވާ އުފެއްދުންތަކަށް ހަރުކަށި ފިޔަވަޅުތައް އެޅުމަށް މި ބިލުގައި ވަނީ ހިމަނާފައެވެ.
ރައީސް މަސްއޫދު ޕެޒެޝްކިއާންގެ ސަރުކާރުން މި ބިލާ ދެކޮޅު ހަދަމުން ބުނެފައިވަނީ، މީގެ ސަބަބުން އިލްމީ މަސައްކަތްތަކަށާއި ބައިނަލްއަގުވާމީ ގުޅުންތަކަށް ހުރަސްއެޅި، ގާބިލު މީހުން ގައުމު ދޫކޮށް ދިއުން އިތުރުވާނެ ކަމަށެވެ. އަދި މިއީ ގާނޫނުއަސާސީއާއި ރައްޔިތުންގެ ޒާތީ މިނިވަންކަމާ ހިލާފު ކަމެއް ކަމަށް ސަރުކާރުން ފާހަގަކުރެއެވެ.
މި ބިލު ގާނޫނަކަށް ވާނީ މަޖިލީހުގެ ފަހުގެ ރުހުމާއި ގާޑިއަން ކައުންސިލްގެ ފާސްވުން ލިބިގެން ކަމުގައި ވިޔަސް، އެތެރޭގެ މިނިވަންކަމާއި ނޫސްވެރިކަމަށް ހުރަސްއެޅޭނެތީ މީޑިއާތަކާއި އާންމުންގެ ފާޑުކިޔުން މި ބިލަށް އަމާޒުވަމުންދެއެވެ.
މި ޕްލޭނަށް އެންމެ ފަހުގެ ގާނޫނީ ސިފަ ލިބޭނީ މަޖިލީހުގެ ފަހުގެ ރުހުމުގެ އިތުރުން، ގާނޫނުއަސާސީ ބަލަހައްޓާ 12 މެންބަރުންގެ މައްޗަށް އެކުލެވޭ "ގާޑިއަން ކައުންސިލް" ގެ ރުހުން ލިބިގެންނެވެ. ނަމަވެސް އެތެރޭގެ މިނިވަންކަމާއި ނޫސްވެރިކަމަށް ބޮޑެތި ހުރަސްތަކެއް ކުރިމަތިވާނެ ކަމަށް ބުނެ، މީޑިއާތަކާއި އާންމުންގެ މެދުގައި މި ބިލާ މެދު އޮތް ފާޑުކިޔުންތައް ދަނީ އިތުރުވަމުންނެވެ
