ދައުލަތުގެ އާމްދަނީއަށް ބޮޑު ކުރިއެރުމެއް ލިބި، ޖުމްލަ އާމްދަނީ 24.1 ބިލިއަން ރުފިޔާއަށް އަރާފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން 23 ޖުލައި 2026 ގެ ނިޔަލަށް އެކުލަވާލާފައިވާ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، މިދިޔަ އަހަރުގެ މި މުއްދަތާ އަޅާބަލާއިރު ދައުލަތަށް ލިބުނު ޖުމްލަ އާމްދަނީއާއި ހިލޭ އެހީ ވަނީ 10.9 އިންސައްތަ އިތުރުވެފައެވެ. މިއީ 2025 ވަނަ އަހަރުގެ މި މުއްދަތުގައި ލިބުނު 21.7 ބިލިއަން ރުފިޔާއާ އަޅާބަލާއިރު 2.4 ބިލިއަން ރުފިޔާގެ އިތުރުވުމެކެވެ.
މި ކުރިއެރުމުގެ މައިގަނޑު ސަބަބަކީ ޓެކްސްގެ ގޮތުގައި ލިބުނު އާމްދަނީ އިތުރުވުމެވެ. ޚާއްޞަކޮށް މުދަލާއި ޚިދުމަތުގެ އަގުން ނަގާ ޓެކްސް (ޖީ.އެސް.ޓީ) އިން ލިބުނު އާމްދަނީ ވަނީ ވަރަށް ބޮޑަށް ކުރިއަރާފައެވެ. ތަފާސްހިސާބުތަކުން ދައްކާގޮތުގައި ޓެކްސް އާމްދަނީ ވަނީ 16.4 ބިލިއަން ރުފިޔާއިން 18.4 ބިލިއަން ރުފިޔާއަށް އުފުލިފައެވެ.
ޓެކްސް އާމްދަނީގެ ތަފްސީލު:
- ޖުމްލަ ޖީ.އެސް.ޓީ: 10.0 ބިލިއަން ރުފިޔާ (9.7 އިންސައްތައިގެ އިތުރުވުމެއް)
- އާންމު ޖީ.އެސް.ޓީ: 3.1 ބިލިއަން ރުފިޔާ (13.6 އިންސައްތައިގެ އިތުރުވުމެއް)
- ޓީ.ޖީ.އެސް.ޓީ: 6.9 ބިލިއަން ރުފިޔާ (8.0 އިންސައްތައިގެ އިތުރުވުމެއް)
މި އަހަރުގެ ތެރޭގައި އާމްދަނީއާއި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައިވާ 40.4 ބިލިއަން ރުފިޔާގެ ތެރެއިން 59.7 އިންސައްތަ މިހާރު ވަނީ ދައުލަތަށް ލިބިފައެވެ.
އާމްދަނީ އިތުރުވި ނަމަވެސް، ދައުލަތުގެ ޚަރަދުތަކަށްވެސް ވަނީ ބަދަލުތަކެއް އައިސްފައެވެ. ރިކަރަންޓް އަދި ކެޕިޓަލް ޚަރަދުގެ ޖުމްލަ 25.5 ބިލިއަން ރުފިޔާއަށް އަރާފައިވާއިރު، މިއީ މިދިޔަ އަހަރަށްވުރެ 19.7 އިންސައްތަ އިތުރު އަދަދެކެވެ. މި އިތުރުވުން އައިސްފައިވަނީ މުވައްޒަފުންގެ މުސާރައާއި، ސިއްހީ ޚިދުމަތްތަކާއި، އިޖުތިމާއީ ރައްކާތެރިކަމުގެ ޕްރޮގްރާމުތަކަށް ކުރާ ޚަރަދުތައް އިތުރުވުމުންނެވެ.
ޚާއްޞަކޮށް، ނޮވެންބަރު 2025 ގައި ސަރުކާރުގެ މުވައްޒަފުންގެ މުސާރަ ބޮޑުކުރުމާ ގުޅިގެން، މުސާރައާއި ޕެންޝަނަށް ކުރި ޚަރަދު ވަނީ 8.5 ބިލިއަން ރުފިޔާއަށް އަރާފައެވެ. މީގެ އިތުރުން، އާސަންދައަށް 1.2 ބިލިއަން ރުފިޔާ އަދި ސަބްސިޑީއަށް 3.2 ބިލިއަން ރުފިޔާ ވަނީ ހޭދަކޮށްފައެވެ. ސަބްސިޑީގެ ޚަރަދު 79 އިންސައްތަ އިތުރުވެފައިވަނީ މެދުއިރުމަތީގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި ތަކެތީގެ އަގު އުފުލުމުގެ ސަބަބުންނެވެ.
މި މުއްދަތުގެ ނިޔަލަށް ދައުލަތުގެ މާލީ ހިސާބުތައް ދައްކާގޮތުން 1.5 ބިލިއަން ރުފިޔާގެ ޕްރައިމަރީ ސަރޕްލަސްއެއް ލިބިފައިވީ ނަމަވެސް، ޖުމްލަ ބެލެންސް ހުރީ 1.4 ބިލިއަން ރުފިޔާގެ ޑެފިސިޓެއްގައެވެ.