ސަރުކާރުގެ އަމާޒަކީ ، މިހާރު ކުރިއަށް ގެންދާ ހައުސިންގ މަޝްރޫޢުގެ ތެރެއިން އަޅާ ފްލެޓްތަކުގައި 2 އަހަރުތެރޭގައި މީހުން ދިރިއުޅެން ދޫކުރަން ކަމަށް މިނިސްޓަރ އޮފް ކޮންސްޓްރަކްޝަން، ހައުސިން އެންޑް އިންފްރާ ސްޓްރަކްޗަރ ޑޮކްޓަރ އަބުދުﷲ މުއްތަލިބު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕީއެސްއެމްގެ ރާއްޖެމިއަދު ޕްރޮގްރާމުގައި ވާހަކަފުޅު ދައްކަވަމުންނެވެ.
ސަރުކާރުން ވަނީ ބީއެމްއެލްއާ ހަވާލުކޮށްގެން 3272 ހައުސިން ޔުނިޓް ތަރައްޤީކުރުމުގެ ޕްރޮޖެކްޓެއް ފަށާފައެވެ. ކުރިން ހަވާލުކުރީ 3000 ޔުނިޓް ތަރައްޤީކުރުމަށް ނަމަވެސް، ފަހުން މި ޢަދަދު ވަނީ ބޮޑުކޮށްފައެވެ.
މިނިސްޓަރ ވިދާޅުވީ މިއީ މިސަރުކާރުން މަސައްކަތް އެންމެ އަވަހަށް ފަށައިގެން ކުރިއަށްގެންދާނެ މަޝްރޫޢު ކަމަށެވެ.
ކުރިއަށް އޮތް މަދު ދުވަސްކޮޅެއްތެރޭ މި މަޝްރޫޢުގެ ޢަމަލީ މަސައްކަތް ފެށުމަށްފަހު، ސަރުކާރުގެ ޢަމާޒަކީ 2 އަހަރުތެރޭގައި މި ފްލެޓްތަކުގައި މީހުން ދިރިއުޅެން ދޫކުރުންކަމަށް ވަޒީރު ވިދާޅުވިއެވެ.
މިނިސްޓަރ މުއްތަލިބު ވިދާޅުވީ ވިދާޅުވީ މި މަސައްކަތުގައި ހިމެނެނީ ވިލިމާލޭގައި ތަރައްޤީކުރާ 312 ހައުސިން ޔުނިޓާއި، ހުޅުމާލެ ފޭސް1ގައި ތަރައްޤީކުރާ 546 ޔުނިޓާއި ހުޅުމާލެ ފޭސް3ގައި ތަރައްޤީކުރާ 2414 ޔުނިޓްކަމަށެވެ.
ބީއެމްއެލްއަށް މިކަމަށްޓަކާ ސަރުކާރުން ހިލޭ ބިން ހަމަޖައްސައިދީ، އަދިވެސް އެހެނިހެން ލުއިތައް ދީފައިވާކަމަށް މިނިސްޓަރ ވިދާޅުވިއެވެ. މީގެ ބޭނުމަކަށްވަނީ ސަރުކާރުގެ ބޯހިޔާވަހިކަމުގެ ސްކީމްތަކުގެ މިންގަޑުތަކުގެ ދަށުން، ސަރުކާރުން ކަނޑައަޅާ ހެޔޮ އަގުތަކެއްގައި އަތްފޯރާފަށުގައި ރައްޔިތުންނަށް މި ތަންތަން ލިބޭނެ މަގު ފަހިކުރުންކަމަށްވެސް މިނިސްޓަރ މުއްތަލިބު ވިދާޅުވިއެވެ.
''ފަސް ޕަސެންޓާއި ހަ ޕަސެންޓްގެ ކުޑަ ޕްރޮފިޓް މާޖިންއެއްގައި ބޭނުންކުރަން މި މަސައްކަތް ކުރަނީ. މި 3300 ޔުނިޓްގެ މަސައްކަތް ބާރަށް ކުރިއަށްދޭ. މި މަސައްކަތުގެ ސައިޓް މަސައްކަތް މިމަހު ފަށާނެ. 2 އަހަރުން މަސައްކަތްތައް ނިންމާ މީހުން ވެއްދޭނަކަމަށް އުއްމީދަކީ." އަބުދުﷲ މުއްތަލިބު ވިދާޅުވިއެވެ.
މުއްޠަލިބް ވިދާޅުވީ، އިންޑިއާގެ ލައިން އޮފް ކްރެޑިޓްގެ ދަށުން 4000 ޔުނިޓް ތަރައްޤީކުރުމަށް ހަމަޖެހިފައިވާއިރު، އެ ފްލެޓްތައް ތަރައްޤީކުރާނީ ގުޅިފަޅުގައިކަމަށެވެ. އެކަމާ ގުޅޭ ލިޔެކިޔުންތަކުގެ މަސައްކަތްތައް ކުރިއަށްދާއިރު، އެކަމުގެ ޢަމަލީ މަސައްކަތް އަހަރުގެ މެދުތެރޭގައި ފައްޓަވާނޭކަމަށްވެސް ވަޒީރު ވިދާޅުވިއެވެ.
"ސަރުކާރުގެ ޢަމާޒަކީ މިއަހަރުގެ ތެރޭގައި 12000 ހައުސިން ޔުނިޓްގެ މަސައްކަތް ފެށުން. މިއީ އެހެން އެއްވެސް ސަރުކާރެއްގައި ފްލެޓް މަސައްކަތް ނުގެންދާ މިންވަރެއް. އިސްކަން ދެނީ 3 ކޮޓަރިގެ ޔުނިޓްތަކަށް. ސަރުކާރުން މިދަނީ ބޯހިޔާވަހިކަމުގެ މަސައްކަތްތަކަށް ވަރަށް ބުރަކޮށް މަސައްކަތްކުރަމުން." އަބުދުﷲ މުއްތަލިބު ވިދާޅުވިއެވެ.