އެމަނިކުފާނުގެ މާޒީއަކީ ގައުމަށް ހިދުމަތްކުރުމުގެ މާޒީއެއް ކަމަށާއި، އެއަށްފަހު މިހާރު މާލޭ މޭޔަރު ކަމަށް ވަޑައިގަންނަވަނީ މާލޭގެ ރައްޔިތުންނަށް ޚިދުމަތް ކުރެއްވުމުގެ އަޒުމުގައި ކަމަށް ކޮންގްރެސް ޕާޓީގެ މާލޭ މޭޔަރ ކެންޑިޑޭޓް މޭޖާ ޖެނަރަލް ރިޓަޔާޑް މޫސާ އަލީ ޖަލީލް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އެމަނިކުފާނުގެ ކެމްޕެއިން އޮފީސް ހުޅުވުމަށް ރޭ ބެއްވެވި ޖަލްސާގައި ވާހަކަފުޅު ދައްކަވަމުންނެވެ.
މޫސާ އަލީ ޖަލީލް ވިދާޅުވީ ސިފައިންގެ ހިދުމަތުގެ އެންމެ ދަށުން ފެށިގެން ގައުމީ ދިފާއީ ބާރުގެ އެންމެ މަތީ މަގާމާ ހަމައަށް ވަޑައިގެންނެވުނުކަމަށާއި، ދިފާއީ ވަޒީރުކަންވެސް ކުރެއްވި ކަމަށެވެ. މިހުރިހާ މަގާމެއްވެސް އަދާކުރެއްވީ ތެދުވެރިކަމާއި އިހުލާސްތެރިކަމާއެކުކަން ފާހަގަކުރައްވަމުން އޭނާ ވިދާޅުވީ މާލޭ ސިޓީ މޭޔަރުކަމަށްވެސް ނުކުމެވަޑައިގަތީ އެގޮތުގައި މާލޭ ސިޓީގެ ރައްޔިތުންނަށް ހިދުމަތްކުރެއްވުމުގެ އަޒުމުގައި ކަމަށެވެ.
އަދި ސިޔާސީ ވިސްނުމަށް ބެއްލެވުމެއް ނެތި ހުރިހާ ރައްޔިތުންނަށް ހަމަހަމަކަމާއެކު ހިދުމަތްކުރައްވާނެ ކަމުގެ ޔަގީންކަން ދެއްވަމުން އޭނާ ވިދާޅުވީ މާލޭ ރައްޔިތުންނަށް އޯގާތެރިކަމާއެކު ހިދުމަތްކޮށްދެއްވައި މާލޭ ސިޓީއަކީ ދިރިއުޅެން ފަސޭހަ، ފަހި، ސާފު ތަނަކަށް ހެއްދެވުމަށް ބޭނުންފުޅުވާ ކަމަށެވެ.
މީގެ އިތުރުން ދާދިފަހުން ރައީސުލްޖުމްހޫރިއްޔާ މާލޭ ރައްޔިތުންނާއެކު ބޭއްވެވި ބައްދަލުވުންތަކުގައި ބައިވެރިވެވަޑައިގެން އެ ރައްޔިތުންގެ އިހުސާސްތައް އަޑުއެއްސެވުމަށްފަހު، ގައުމީ ހިދުމަތުގައި އެތައް އަހަރެއް ހޭދަކުރެއްވުމަށްފަހު ގެއަށް ވަދެވަޑައިގަންނަވަންވީތޯ ހިތްޕުޅުގައި ސުވާލު އުފެދުނުކަމަށްވެސް ވިދާޅުވިއެވެ.
ހަށިގަނޑުގައި ބާރުހުރެ، ހިދުމަތުގައި ޚިދުމަތުގެ ތަޖުރިބާއާއި އެކު ރައީސް ޑރ.މުޢިއްޒު ފަދަ ހީވާގީ ލީޑަރެއްގެ ފަހަތްޕުޅުގައި ގައުމަށް ހިދުމަތްކުރުމަށް މިއީ ރަނުގެ ފުރުސަތެއް ކަމަށް ވެސް ޖަލީލު ވިދާޅުވިއެވެ.
"ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މޭޔަރުކަމުގައި ހުންނެވި ދެ އަހަރާއި ފަސް މަހާއި ދުވަސްކޮޅެއްގެ ތެރޭގައި މާލޭ ސިޓީގެ މުނިސިޕަލް ހިދުމަތުގެ ރަންޒަމާނެއް އައިސްގެންދިޔަ. ރައްޔިތުންގެ ގޭގެއަށް ސިލްސިލާކޮށް ޒިޔާރަތްކުރައްވައި، ސިލްސިލާކޮށް ރައްޔިތުންގެ ބައްދަލުވުންތައް ބާއްވަވައި، ރައްޔިތުންގެ އަޑު ގާތުން އެއްސެވި. ހާލު އަހުވާލު ބެއްލެވި، މާލޭ ސިޓީގައި ހައްލުނުވެހުރި އެތައް މައްސަލައެއް ހައްލުކުރެއްވި" މޫސާ އަލީ ޖަލީލް ވިދާޅުވިއެވެ.