ސައިބަރ ސެކިއުރިޓީ އެންޑް ރެޒިލިއެންސްގެ ދާއިރާއިން ތަމްރީނު ހޯދުމަށް، ސަރުކާރުގެ ކަމާބެހޭ ވުޒާރާތަކާއި އިދާރާތަކުގެ 15 މުވައްޒަފުން އޮސްޓްރޭލިޔާއަށް ރޭ ފުރައިފިއެވެ.
ސައިބަރ ސެކިއުރިޓީ އެންޑް ރެޒިލިއެންސް ދާއިރާއިން ދިވެހިރާއްޖޭގެ ސަލާމަތާއި ރައްކާތެރިކަމަށް މަގުފަހިކުރުމަށް ކުރިއަށްގެންދާ މި ތަމްރީނުތައް ހިންގަން ހަމަޖެހިފައިވަނީ ސައިބަރ ސެކިއުރިޓީ އެޑިޔުކޭޝަން އެންޑް ރިސާޗްގެ ދާއިރާއިން ބައިނަލްއަގުވާމީ ފެންވަރުގައި މަތީ ވަނަތަކެއް ހާސިލުކޮށްފައިވާ އެޑިތު ކޯވަން ޔުނިވަސިޓީ (އީ.ސީ.ޔޫ.) އާއި ރައީސުލްޖުމްހޫރިއްޔާގެ އޮފީހާއި ގުޅިގެންނެވެ. މި ޕްރޮގްރާމްގެ ހުރިހާ ޚަރަދެއް ކުރުމަށް ހަމަޖެހިފައިވަނީ އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑް (ޑީ.އެފް.އޭ.ޓީ.) ގެ އޮސްޓްރޭލިއާ އެވޯޑްސް 2026 ގެ މާލީ އެހީތެރިކަމާއިއެކުގައެވެ.
މި ފެލޯޝިޕް ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ ޖެނުއަރީ 19 އިން ފެބްރުއަރީ 3 އަށް އީ.ސީ.ޔޫ. އާއި ވެސްޓާން އޮސްޓްރޭލިއާގެ ކަމާބެހޭ ސައިބަރ ސެކިއުރިޓީ އެންޑް ރެސިލިއަންސް މުއައްސަސާތަކުގައެވެ. މި ޕްރޮގްރާމްގައި، އެޑްވާންސް ސައިބަރ ގަވަރނަންސް، ޑިޖިޓަލް ރިސްކް މެނޭޖްމަންޓް، އިންސިޑެންޓް ރެސްޕޮންސް ކޯޑިނޭޝަން އަދި ރެސިލިއަންސް ޕްލޭނިންގ ފަދަ ދާއިރާތަކުން ބައިވެރިންނަށް، ތަޖުރިބާ ލިބޭނެއެވެ.
މި ޕްރޮގްރާމަށް ފުރުމުގެ ކުރިން ފެލޯޝިޕްގެ ބައިވެރިންވަނީ ޕްރީޑިޕާޗަރ ބްރީފިންގއެއް ފުރިހަމަކޮށްފައެވެ. 13 ޖަނަވަރީ 2026 ވަނަ ދުވަހު ރައީސުލްޖުމްހޫރިއްޔާ އޮފީހުގައި ބޭއްވި މި ބައްދަލުވުމުގައި އޮސްޓްރޭލިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖެސަޕާއި، ނޭޝަނަލް ސެކިއުރިޓީ އެޑްވައިޒަރ އިބްރާހީމް ލަޠީފް ޑީސީ (ރޓ)، ލެފްޓިނެންޓް ކާނަލް (ރޓ) އާއި މިނިސްޓަރ އޮފް ސްޓޭޓް ފޮރ ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޑރ މުޙައްމަދު ކިނާނަތު ގެ އިތުރުން އެޑިތު ކޯވަން ޔުނިވަރސިޓީގެ މަންދޫބު ވަނީ އޮންލައިންކޮށް ބައިވެރިވެވަޑައިގެންފައެވެ.
މި ބައްދަލުވުމުގައި ޕްރޮގްރާމްގެ މަގްސަދުތަކާއި، އެކަޑަމިކް މޮޑިއުލްތަކާއި، އެންގޭޖްމަންޓް ފުރުސަތުތަކުގެ މައްޗަށް އަލިއަޅުވާލާފައިވެއެވެ. މި ފެލޯޝިޕް ވެގެންދާނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ "މޯލްޑިވްސް 2.0" ވިޜަންގެ ދަށުން ސަރުކާރުގެ ޑިޖިޓަލައިޒޭޝަން އެޖެންޑާ ކުރިއެރުވުމަށް އެޅޭނެ މުހިންމު ފިޔަވަޅަކަށެވެ. މި ޕްރޮގްރާމްގެ ދަށުން ސައިބަރ ސެކިއުރިޓީ ދާއިރާގެ މާހިރުންގެ ތަޢުލީމާއި ތަޖުރިބާ ރާއްޖޭގައި އިތުރުވެގެންދާނެއެވެ.