ކުރީގެ ރައީސް މައުމޫން އަބްދުއްގައްޔޫމްގެ ވެރިކަމުގައި ބިނާކުރި މާލޭގެ އިސްލާމީ މަރުކަޒުގެ އާބާތުރަ ފިލުވައި، އެ ތަން މަރާމާތު ކުރުމަށް މައުމޫން ފައުންޑޭޝަނުން އެހީތެރިކަން ފޯރުކޮށްދިނުމުގެ އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހަންމަދު ޝަހީމް އަލީ ސައީދެވެ. މައުމޫން ފައުންޑޭޝަނުގެ ފަރާތުން ސޮއިކުރެއްވީ އެ ފައުންޑޭޝަނުގެ ޗެއާމަން، ރައީސް މައުމޫން އަބްދުލްގައްޔޫމެވެ.
މި އެއްބަސްވުމުގެ ދަށުން އިސްލާމީ މަރުކަޒުގެ އިމާރާތުގައި ހުރި އާބާތުރަ ފިލުވައި، އެކަށީގެންވާ ދިގު މުއްދަތަކަށް ބޭނުންކުރެވޭނެ ފަދަ ވަރުގަދަ އިމާރާތަކަށް އެ ތަން ހެދުމަށް މަޝްރޫއެއް ރޭވުމަށް ވަނީ ހަމަޖެހިފައެވެ. މައުމޫން ފައުންޑޭޝަނުން ބުނި ގޮތުގައި، ރާއްޖެ އާއި ރާއްޖޭން ބޭރުން އެހީ ހޯދައިގެން، ދެ ފަރާތުން އެއްބަސްވާ ގޮތެއްގެ މަތިން އެ މަސައްކަތް ކުރިއަށް ގެންދާނެއެވެ.
މީގެ އިތުރުން، އިސްލާމިކް މިނިސްޓްރީން އިސްލާމީ މަރުކަޒުގައި ބާއްވާ ދީނީ އެކި މުނާސަބާތަކުގައި ރައީސް މައުމޫން ތަގުރީރު ކުރައްވާ ގޮތަށް ވެސް ވަނީ ހަމަޖެހިފައެވެ. އަދި ރައީސް މައުމޫން ލިޔުއްވާފައިވާ ދީނީ ފޮތްތައް އިސްލާމީ މަރުކަޒުގެ ލައިބްރަރީން އާންމުންނަށް ފެންނާނެ އިންތިޒާމު މިނިސްޓްރީން ހަމަޖައްސައިދޭނެ ކަމަށް އެ ފައުންޑޭޝަނުން މައުލޫމާތު ދެއެވެ.
މި އެއްބަސްވުމުގެ ދަށުން މައުމޫން ފައުންޑޭޝަނުން ކުރިއަށް ގެންދާ ދީނީ އަދި އިޖުތިމާއީ ހަރަކާތްތަކުގައި އިސްލާމިކް މިނިސްޓްރީގެ އެހީތެރިކަން ލިބޭނެއެވެ. މީގެ ތެރޭގައި އެ ފައުންޑޭޝަނުގެ ޑިޖިޓަލް އާކައިވް އާއި ލައިބްރަރީ އުފެއްދުމުގެ މަސައްކަތުގައި މިނިސްޓްރީގެ ފަރާތުން ފަންނީ އެހީތެރިކަން ފޯރުކޮށްދިނުން ހިމެނެއެވެ.