މާދަމާރޭ ރާއްޖޭގެ ހުރިހާ ރަށެއްގައި ކޭތަ ނަމާދު ކުރުމުގެ އިންތިޒާމު ހަމަޖައްސަން އިސްލާމިކް މިނިސްޓްރީން އަންގައިފިއެވެ.
ބުރާސްފަތި ދުވަހު ނެރުނު ސާކިއުލާއެއްގައި އެ މިނިސްޓްރީން ބުނީ، މާދަމާރޭ ރާއްޖޭގެ ގަޑިން 8:28 ހާއިރު ހަނދުކޭތަ ހިފަން ފަށާނެ ކަމަށާއި، އެންމެ ބޮޑަށް ކޭތަ ހިފާފައި ހުންނާނީ އެ ރޭ 11:11 ހާއިރު ކަމަށެވެ.
ހަނދުކޭތަ ވީއްލާނީ މެންދަމުން އަލިވެ 1:55 ހާއިރު ކަމަށް، މިނިސްޓްރީން ބުންޏެވެ.
މިނިސްޓްރީގެ ސާކިއުލާގައިވަނީ، މާދަމާރޭ 11:12 ގައި، މީހުން ދިރިއުޅޭ ހުރިހާ ރަށެއްގެ އެންމެ ބޮޑު މިސްކިތުގައި ކޭތަ ނަމާދުކުރުމުގެ އިންތިޒާމު ހަމަޖައްސައިދިނުމަށް ކައުންސިލްތަކަށް އަންގައިފައެވެ. އަދި ކޭތަ ނަމާދުގެ ޚުތުބާ މާދަމާ މިނިސްޓްރީގެ ވެބްސައިޓުން ފެންނަން ހުންނާނެ ކަމަށް ވެސް އެ ސާކިއުލާގައި ފާހަގަކޮށްފައިވެއެވެ.
އިސްލާމިކް މިނިސްޓްރީން އެ ސާކިއުލާ ކައުންސިލްތަކަށް ފޮނުވީ މިއަދެވެ.
ހަނދުކޭތަ ހިފަނީ އިރާއި ބިމާއި ހަނދު ސީދަލަށް އެތުރި، އިރުގެ އަލިކަމުގެ ސަބަބުން ހަނދަށް ދުނިޔޭގެ ހިޔަނި އެޅުމުގެ ސަބަބުންނެވެ. އަދި ހަނދު ފުސް ރަތް ކުލައެއްގައި ފެންނަނީ ނުވަތަ ބްލަޑް މޫންއަކަށް ވަނީ އިރުގެ ބައެއް ދޯދިތައް ދުނިޔޭގެ ޖައްވުން ގޮސް ހަނދަށް އެޅޭތީއެވެ.
މި ލިޔުން ކިޔާލުމުން
