ފިޝަރީޒް މިނިސްޓްރީން ދުނިޔޭގެ ކަނޑުތަކުގެ ދުވަހާ ގުޅިގެން ކުއިޒް މުބާރާތެއް ބާއްވައި، ފައިސާގެ އިނާމު ހޯދުމުގެ ފުރުސަތު އާންމުންނަށް ހުޅުވާލައިފިއެވެ. މި މުބާރާތް ކުރިއަށްދާނީ މިއަދުން ފެށިގެން މި މަހުގެ 17 ވަނަ ދުވަހާ ހަމައަށް ކަމަށް އެ މިނިސްޓްރީން މަޢުލޫމާތު ދީފައިވެއެވެ.
ފިޝަރީޒް މިނިސްޓްރީގެ ރަސްމީ މީސްމީޑިއާ އެކައުންޓްގައި ޕޯސްޓްކޮށްފައިވާ މަޢުލޫމާތުގައިވާ ގޮތުން، މި މުބާރާތުގައި ކޮންމެ ދުވަހެއްގެ ހެނދުނު 9:00 ގައި ދެ ސުވާލެއް އެ މިނިސްޓްރީގެ ރަސްމީ މީސްމީޑިއާ އެކައުންޓްގައި ޕޯސްޓްކުރާނެއެވެ. ބައިވެރިންނަށް އެ ދުވަހެއްގެ މެންދަމު 12:00 ގެ ކުރިން ކޮމެންޓް ސެކްޝަންގައި އެ ދެ ސުވާލަށް ޖަވާބު ފޮނުވަންޖެހޭނެއެވެ.
މި މުބާރާތުގައި އެއްވަނައަށް ދާ ފަރާތަކަށް 1,000 ރުފިޔާގެ އިނާމެއް ކަނޑައަޅާފައިވާއިރު، ދެވަނައަށް ދާ ފަރާތަކަށް 750 ރުފިޔާ އަދި ތިންވަނައަށް ދާ ފަރާތަކަށް 500 ރުފިޔާގެ އިނާމެއް ކަނޑައަޅާފައިވެއެވެ.
ދުނިޔޭގެ ކަނޑުތަކުގެ ދުވަސް ނުވަތަ ބައިނަލްއަޤްވާމީ ކަނޑުތަކުގެ ދުވަހަކީ ކޮންމެ އަހަރެއްގެވެސް ޖޫން މަހުގެ 8 ވަނަ ދުވަހު ފާހަގަކުރާ ދުވަހެކެވެ. މި ދުވަހާ ގުޅިގެން ފިޝަރީޒް މިނިސްޓްރީން މި ކުއިޒް މުބާރާތް ބޭއްވުމުގެ މަޤްޞަދަކީ ކަނޑުތަކާ ގުޅޭ ހޭލުންތެރިކަން އިތުރުކުރުމާއި، ކަނޑުތަކުގެ މުހިންމުކަމާމެދު އާންމުން ހޭލުންތެރިކުރުވުން ކަމަށް ބެލެވެއެވެ.
މި މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކަށް ފިޝަރީޒް މިނިސްޓްރީގެ ރަސްމީ މީސްމީޑިއާ އެކައުންޓްތައް މެދުވެރިކޮށް ބައިވެރިވެވޭނެއެވެ.
