ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ނައިބު ރައީސްގެ މަޤާމަށް އެ ކޮމިޝަންގެ މެންބަރު، މުއުމިނާ ވަޙީދު ޢައްޔަނުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ. މި މަޤާމަށް މުއުމިނާ ޢާއްޔަނުކުރަން ފެންނަ ކަމަށް 67 މެންބަރަކު ވަނީ ވޯޓު ދެއްވައިފައެވެ.
އެ ކޮމިޝަންގެ ނައިބު ރައީސަކަށް މުއުމިނާ ޢައްޔަނުކުރެއްވުމަށް ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ފޮނުއްވި ނަން، މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް އަށް ފޮނުވުމުން، އެ ކޮމިޓީގެ މެންބަރުންގެ އިއްތިފާޤުން އިއްޔެ ވަނީ އެ ނަން ފާސްކޮށްފައެވެ.
08 ސެޕްޓެންބަރު 2020 ގައި އެޗްއާރުސީއެމް ގެ މެންބަރުކަމަށް ޢައްޔަނުކުރެއްވި މުއުމިނާ އަކީ ހިއުމަން ރައިޓްސް އެންޑް ޑިމޮކްރަޓައިޒޭޝަން އޭޝިއާ ޕެސިފިކްގެ ދާއިރާއިން އޮސްޓްރޭލިއާއިން މާސްޓަރސް ޑިގްރީ އަދި ބިޒްނަސް ދާއިރާއިން ބެޗްލަރސް ޑިގްރީ ހާސިލުކުރައްވާފައިވާ ބޭފުޅެކެވެ.
މުއުމިނާގެ އިތުރުން މިވަގުތު އެޗްއާރުސީއެމްގައި ތިއްބެވީ އެ ކޮމިޝަންގެ ރައީސް މަރްޔަމް މުނާ އާއި، މެންބަރުން ކަމަށްވާ އާމިނަތު ޝިފާޢަތު ޢަބްދުއްރައްޒާޤާއި، އަލްއުސްތާޛާ ސަމާޢު އަޙްމަދު ނަޖީބު އަދި އަލްއުސްތާޛް އިސްމާޢީލް ޙަބީބު ޢަބްދުއްރަޙީމެވެ.
މި ލިޔުން ކިޔާލުމުން
