ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ނައިބު ރައީސްގެ މަޤާމަށް އެ ކޮމިޝަންގެ މެންބަރު، މުއުމިނާ ވަޙީދު ޢައްޔަނުކުރުމަށް ރުހުން ހޯދަން ރައްޔިތުންގެ މަޖިލީހަށް ހުށަހަޅައިފިއެވެ.
މިގޮތުން އެ ކޮމިޝަން ނައިބު ރައީސަކަށް މުއުމިނާ ޢައްޔަނުކުރެއްވުމަށް ރުހުން ހޯއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ފޮނުއްވި ސިޓީފުޅު ދައުރުން ބޭރުން މިއަދު ބޭއްވި މަޖިލީހުގެ ޖަލްސާގައި އިއްވަވާފައިވާއިރު، އެ މައްސަލަ ދިރާސާކުރުމަށް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ވަނީ ފޮނުވައިފައެވެ.
08 ސެޕްޓެންބަރު 2020 ގައި އެޗްއާރުސީއެމް ގެ މެންބަރުކަމަށް ޢައްޔަނުކުރެއްވި މުއުމިނާ އަކީ ހިއުމަން ރައިޓްސް އެންޑް ޑިމޮކްރަޓައިޒޭޝަން އޭޝިއާ ޕެސިފިކްގެ ދާއިރާއިން އޮސްޓްރޭލިއާއިން މާސްޓަރސް ޑިގްރީ އަދި ބިޒްނަސް ދާއިރާއިން ބެޗްލަރސް ޑިގްރީ ހާސިލުކުރައްވާފައިވާ ބޭފުޅެކެވެ.
މުއުމިނާގެ އިތުރުން މިވަގުތު އެޗްއާރުސީއެމްގައި ތިއްބެވީ އެ ކޮމިޝަންގެ ރައީސް މަރްޔަމް މުނާ އާއި، މެންބަރުން ކަމަށްވާ އާމިނަތު ޝިފާޢަތު ޢަބްދުއްރައްޒާޤާއި، އަލްއުސްތާޛާ ސަމާޢު އަޙްމަދު ނަޖީބު އަދި އަލްއުސްތާޛް އިސްމާޢީލް ޙަބީބު ޢަބްދުއްރަޙީމެވެ.
މި ލިޔުން ކިޔާލުމުން
