މަސައްކަތް ކުރައްވާނީ ވީހާވެސް ދެފުށް ފެންނަ ގޮތަކަށް، ނަތީޖާއާ ހަމައަށް ވާސިލުވުމަށް ކަމުގައި އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވަޒީރު، ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
ރައީސް އޮފީހުގައި މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ވާހަަކަދައްކަވަމުން ޑރ. މުއްޠަލިބް ވިދާޅުވީ، ގެދޮރުވެރިޔާ ސްކީމްގެ ދަށުން ފުލެޓު ލިބޭ ފަރާތްތަކުގެ ލިސްޓަކީ 15 ނޮވެންބަރު 2023 ގައި އިޢުލާންކުރެވުނު ލިސްޓަކަށްވެފައި، ލިސްޓުގައި ހުރި ކަމަށް އެކި އިދާރާތަކުން ފާހަގަކޮށްފައިވާ މައްސަލަތައް ހައްލުކޮށް، ވެރިފައިކުރެވިފައިވާ ލިސްޓު ވޭތުވެދިޔަ 14 މަސް ތެރޭގައި ނެރެވިފައި ނުވާތީ، މި ސްކީމަށް ފޯމު ހުށަހެޅި ހުރިހާ ފަރާތްތަކުގެ ކިބައިން މަޢާފަށް އެދިވަޑައިގަންނަވާ ކަމަށެވެ.
ޑރ. މުއްޠަލިބް ވިދާޅުވީ، މި ލިސްޓުގެ މަސައްކަތް ކުރެވިފައިވަނީ ރިޔާސީ އިންތިޚާބެއްގެ ތެރޭގައި ކަމަށްވެފައި، އިންތިޚާބު ނިމި ވެރިކަން ބަދަލުވުމާ ދޭތެރޭގައި ލިބުނު މަދު ދުވަސްކޮޅުގެ ތެރޭގައި ވަރަށް ބޮޑެތި ބަދަލުތަކެއް އަންނަ ގޮތަށް ލިސްޓު ތައްޔާރުކުރެވިފައި ވާތީ، ނެރެވުނު ލިސްޓާ ދޭތެރޭގައި ރައްޔިތުންގެ މެދުގައި ބޮޑެތި ކަންބޮޑުވުންތަކެއް އެބަހުރި ކަމަށެވެ. އަދި ވަޒީރު ވިދާޅުވީ، އެންޓި-ކޮރަޕްޝަން ކޮމިޝަން (އޭސީސީ) އިން ވެސް މި ލިސްޓުގައި ބޮޑެތި މައްސަލަތަކެއް ހުރިކަން ފާހަގަކޮށް، ކަންކަން ރަނގަޅުކުރުމަށް އަންގާފައިވާ ކަމަށާއި، މި މަސައްކަތް ކުރިން ހަވާލުވެގެން ތިއްބެވި ބޭފުޅުންވެސް ކުރައްވާފައިވަނީ އިންސާފުވެރިކަމާއެކު ކަމަށެވެ.
އެގޮތުން މި ސަރުކާރު ހަވާލުވިއިރު 4،000 ފުލެޓުގެ މަސައްކަތް އޭސީސީން ވަނީ ހުއްޓުވާފައި ކަމަށާއި، 14 ފެބުރުވަރީ ގައި އެންގީ އުސޫލާ އެއްގޮތަށް ނޫންކޮށް ހުރި ފޯމުތައް އަލުން ރިވިއުކުރަން އެންގި ކަމަށާއި، އެކަން ކުރަން މިނިވަން ކޮމިޓީއެއް އެކުލަވާލައިގެން، އެ ކޮމިޓީގެ ލަފާގެ މަތިން ކުރިއަށް ގެންދެވޭތޯ ބަލާފައިވާ ކަމަށް ވަޒީރު ވިދާޅުވިއެވެ.
މީގެ އިތުރުން ބޯހިޔާވަހިކަމަކީ އެންމެ ހައްސާސް އެއް އިޖުތިމާޢީ މައްސަލަ ކަމަށްވާއިރު، ލަސްވެގެންދާ ކޮންމެ ދުވަހަކީ ރައްޔިތުންގެ ތެރޭގައި ކަންބޮޑުވުން އިތުރުވެ، މި މަސައްކަތް ކުރާ ފަރާތްތަކާ ދޭތެރޭ ގޮތްގޮތަށް ވާހަކަ ދެއްކުމުގެ ފުރުޞަތު ލިބިގެންދާނެ ކަމެއްކަން ޤަބޫލުކުރައްވާ ކަމުގައި ވަޒީރު ވިދާޅުވިއެވެ.
"މި މަޤާމުގައި އަޅުގަނޑު މަސައްކަތް ކުރާނީ ވީހާވެސް ދެފުށް ފެންނަ، ރައްޔިތުންނަށް މަޢުލޫމާތު ހިއްސާކޮށްގެން ނަތީޖާއާ ހަމައަށް ވާސިލުވުމަށް"، ޑރ. މުއްޠަލިބް ވިދާޅުވިއެވެ.
މި ލިޔުން ކިޔާލުމުން
