ދުނިޔޭގެ އެންމެ ދުވަސްވީ މީހާ ކަމަށްވާ ތޮމިކޯ އިތޫކާ އުމުރުން 116 އަހަރުގައި މަރުވެއްޖެއެވެ. އޭނާއަކީ ޖަޕާނުގެ އަންހެނެކެވެ.
ދުވަސްވީ މީހުންގެ ސިޔާސަތުތަކާ ހަވާލުވެހުރި އޮފިޝަލް ޔޮޝިޓްސުގު ނަގަޓާ ބުނިގޮތުގައި އިތޫކާ މަރުވެފައި ވަނީ ޑިސެންބަރު 29 ވަނަ ދުވަހު ޖަޕާނުގެ މެދުތެރޭގައި އޮންނަ ހިޔޯގޯ ޕްރިފެކްޗަރގެ އަޝިޔާގައި ހުންނަ ކެއަރ ހޯމެއްގައެވެ.
ކޭލާއާއި ކަލްޕިސް ކިޔާ ޔޯގަޓް ރަހަ ހުންނަ ޖަޕާނުގެ ބުއިމަށް ވަރަށް ލޯބިކުރާ އިތޫކާ އުފަންވެފައިވަނީ 23 މޭ 1908 ގައެވެ. ޖެރޮންޓޮލޮޖީ ރިސާޗް ގްރޫޕްގެ ދިރާސާގައި ބުނެފައިވާ ގޮތުގައި، 117 އަހަރުގެ މަރިއާ ބްރަންޔަސް މަރުވުމާ ގުޅިގެން އޭނާ ވެފައި ވަނީ މިދިޔަ އަހަރު ދުނިޔޭގެ އެންމެ ދުވަސްވީ މީހާއަށެވެ.
ދުނިޔޭގެ ސުޕަރސެންޓެނޭރިއަން ރޭންކިންގްސް ލިސްޓުގެ އެންމެ މަތީގައި އިން ކަމުގެ ޚަބަރު ލިބުމުން، އޭނާ ހަމައެކަނި ބުނެފައިވަނީ "ޝުކުރިއްޔާ"، މިހެންނެވެ.
އިތޫކާ މިދިޔަ އަހަރު އުފަންދުވަސް ފާހަގަކުރިއިރު، އޭނާއަށް މޭޔަރުގެ ފަރާތުން މާމެލާމެއްޔާއި، ކޭކެއް އަދި ކާޑެއް ވެސް ވަނީ ލިބިފައެވެ،
އޮސާކާގައި އުފަންވެފައިވާ އިތޫކާއަކީ ހައި ސްކޫލުގައި ވޮލީބޯޅަ ކުޅުންތެރިއެކެވެ. އަދި އޭނާގެ ހަލުވިކަމާއި ކުޅަދާނަކަމަށް މަޝްހޫރުވެފައިވާ މީހެކެވެ. އޭނާ ވަނީ 3,067 މީޓަރު (10,062 ފޫޓު) އުސްމިނުގެ މައުންޓް އޮންޓާކޭއަށް ވެސް ދެފަހަރު މަތިން އަރާފައެވެ.
ގިނަސް ވޯލްޑް ރިކޯޑުން ބުނާގޮތުގައި އޭނާ ކައިވެނިކުރީ އުމުރުން އެންމެ 20 އަހަރުގައެވެ. އަދި އޭނާއަށް ދެ އަންހެން ކުދިންނާއި ދެ ފިރިހެން ކުދިން ވަނީ ލިބިފައެވެ.
ދެވަނަ ބޮޑު ހަނގުރާމައިގެ ތެރޭގައި އިތޫކާ ވަނީ އޭނާގެ ފިރިމީހާގެ ހެދުން ފެކްޓަރީގެ އޮފީސް ހިންގުމުގެ ކަންކަން ބަލަހައްޓާފައެވެ. އޭނާގެ ފިރިމީހާ ވަނީ 1979 ގައި މަރުވެފައެވެ. އޭގެ ފަހުން އިތޫކާ ދިރިއުޅުނީ ނާރާ ކިއުނު ހިސާބެއްގައި އެކަނިމާ އެކަނިއެވެ.
އޭނާ ދުނިޔެ ދޫކޮށް ދިޔައިރު އޭނާގެ އެއް ފިރިހެން ދަރިއާއި އެއް އަންހެން ދަރިއާއި ފަސް މާމަ ކުދިން ދުނިޔޭގައި އެބަތިއްބެވެ.
ޖެރޮންޓޮލޮޖީ ރިސަރޗް ގްރޫޕުން ބުނާގޮތުގައި މިހާރު ދުނިޔޭގެ އެންމެ ދުވަސްވީ މީހާއަކީ 116 އަހަރުގެ ބްރެޒިލްގެ ނަންއެކެވެ. އޭނާގެ ނަމަކީ އިނާ ކަނަބާރޯ ލޫކަސްއެވެ. އޭނާ އުފަންވެފައިވަނީ އިތޫކާ އުފަންވި ދުވަހުގެ 16 ދުވަސް ފަހުންނެވެ.
