ފެނަކަ ކޯޕަރޭޝަން ލިމިޓެޑުން ފާއިތުވި އަހަރުގެ ތެރޭގައި 900 މިލިއަން ރުފިޔާގެ ދަރަނި އަދާކޮށްފައިވާ ކަމަށް އެ ކުންފުނިން ހާމަކޮށްފިއެވެ.
މިގޮތުން ފާއިތުވި އެއް އަހަރު އެ ކުންފުނިން ކޮށްފައިވާ މަސައްކަތްތައް ހިމަނައި ޝާއިޢުކޮށްފައިވާ ރިޕޯޓުގައިވާ ގޮތުން 2024 ވަނަ އަހަރު ހިންގުމުގެ ޚަރަދުން ވަނީ 160 މިލިއަން ރުފިޔާ ކުޑަކޮށްފައެވެ.
މީގެ އިތުރުން، 2023 ވަނަ އަހަރުގެ ނޮވެންބަރު މަހުގެ ނިޔަލަށް އެ ކުންފުނިން 1300 މިލިއަން ރުފިޔާގެ ލޯނު ދައްކަން ހުރިއިރު، އޭގެ ތެރެއިން މި އަހަރުގެ ތެރޭގައި ވަނީ 300 މިލިއަނަށްވުރެ ގިނަ ރުފިޔާގެ ލޯނު އަދާކޮށްފައެވެ. އަދި، ވެންޑަރުންނަށް ނުދައްކާ ހުރި 3400 މިލިއަން ރުފިޔާގެ ތެރެއިން 600 މިލިއަން ރުފިޔާ ދައްކާފައިވެއެވެ. އޭގެތެރޭގައި 281 ވެންޑަރަކަށް ދައްކަން ޖެހޭ ފައިސާ އެއްކޮށް ދައްކައި ޚަލާސްކުރެވިފައިވާ ކަމަށް އެ ރިޕޯޓުގައި ބުނެފައިވެއެވެ.
އެ ރިޕޯޓުގައިވާ ގޮތުން ފެނަކައިގެ އައު މެނޭޖްމަންޓުން ކުންފުންޏާ ހަވާލުވިއިރު، ކުންފުނީގެ ދަރަނީގެ ގޮތުގައި 4 ބިލިއަނަށްވުރެ ގިނަ ރުފިޔާ ރެކޯޑު ކުރެވިފައިވެއެވެ. އެއީ ކުންފުންޏަށް ލިބޭ އާމްދަނީއާ ނުބައްދަލު އަދަދެއް ކަމަށްވުމާއެކު، ކުންފުނީގެ މާލިއްޔަތަށާއި ހިންގުމަށް އޮތް އެންމެ ބޮޑު ގޮންޖެހުން ކަމަށް ރިޕޯޓުގައި ސިފަކޮށްފައިވެއެވެ. މާލީ ގޮތުން ކުންފުނި ވެއްޓިފައިވާ ހާލަތުން އަރައިގަތުމަށް އުނދަގޫ އެހަނސް މަޖުބޫރު ފިޔަވަޅުތަކެއް އަޅައި، ކުންފުނީގެ ހިންގުމުގެ ޚަރަދު ކުޑަކޮށް، މާލީ އިންތިޒާމްތައް ހަރުދަނާކުރެވިގެންދިޔަ ކަމަށް އެ ކުންފުނިން ރިޕޯޓުގައި ބުނެފައިވެއެވެ.
މި ލިޔުން ކިޔާލުމުން
