ސަރުކާރަށް 52 ހަފުތާ ފުރުމުގެ މުނާސަބަތު ފާހަގަކުރުމުގެ ގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ފަރާތުން ކުރިއަށް ގެންދާ ޙަރަކާތްތަކުގެ ތެރޭގައި ހިމެނޭ "ޤައުމިއްޔަތު ދަތުރު" މިއަދު ކުރިއަށް ގެންގޮސްފިއެވެ.
އާންމުކޮށް ބައިވެރިވެވޭގޮތަށް ހުޅުވާލައިގެން މިއަދު ހެނދުނު ކުރިއަށް ދިޔަ މި ޙަރަކާތުގައި ދަތުރުގެ ބައިވެރީން ވަނީ މާލޭގައި ހުރި އާސާރީ ތަންތަނަށް ޒިޔާރަތްކޮށް، އެތަންތަނާ ބެހޭ ތާރީޚީ މަޢުލޫމާތު އޮޅުންފިލުވާފައެވެ.
މިއަދު ހެނދުނު 09:00 ގައި ފެށި މި ދަތުރުގެ ބައިވެރީން ފުރަތަމަ ޒިޔާރަތް ކުރީ ޝަހީދުންގެ ދަނާވައްޗަށެވެ. މީގެ އިތުރުން މި ދަތުރުގެ ބައިވެރިން ވަނީ، ބިހުރޯޒް ކަމަނާ މިސްކިތް، ޢީދު މިސްކިތް، އަލިރަސްގެފާނު ޒިޔާރަތް، މެދު ޒިޔާރަތް، ހުކުރު މިސްކިތް، ގުޅަކުޅޭ ފަސްގަނޑު، އުސްގެކޮޅު، ކަޅުއޮށްފުންމި، ކަޅުވަކަރު މިސްކިތް އަދި ޤައުމީ ދާރުލްއާސާރަށްވެސް ޒިޔާރަތްކޮށްފައެވެ.
މިދަތުރުގައި މާލޭގެ އާސާރީ ތަންތަނާ ބެހޭ ގޮތުން ދަތުރުގެ ބައިވެރީންނަށް މަޢުލޫމާތު ޙިއްސާކޮށްދެއްވީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު އަޙްމަދު ޢަލާ ދީދީއެވެ.
ޤައުމިއްޔަތު މިނިސްޓްރީން ހާމަކުރާ ގޮތުގައި މިދަތުރަކީ އެމްޓީސީސީއާއި ފުލުހުންނާއި ދިރާގުގެ އެހީތެރިކަމާ އެކު ކުރިއަށް ގެންދިޔަ ދަތުރެކެވެ.
މި ލިޔުން ކިޔާލުމުން
