ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ "އޮޕަރޭޝަން ކުރަނގި" ފުވައްމުލަކު ސިޓީގައި ފަށަން ތައްޔާރުވެއްޖެއެވެ.
ފުވައްމުލަކު ސިޓީ ކައުންސިލުން މިއަދު ބުނީ އެ ސިޓީގައި މަސައްކަތް ކުރަމުންދާ ބިދޭސީ މަސައްކަތްތެރިންގެ މައުލޫމާތު އަދާހަމަކުރުމުގެ ގޮތުން 05 ނޮވެމްބަރ 2024 އިން 20 ނޮވެމްބަރ 2024 ގެ ނިޔަލަށް، އެ ސިޓީގައި ދިރިއުޅޭ ހުރިހާ ބިދޭސީ މަސައްކަތްތެރިންގެ ބަޔޯމެޓްރިކްސް ނެގުމުގެ މަސައްކަތް ކުރަމުންދާނެ ވާހަކަ ބިދޭސީ މަސައްކަތްތެރިން ގެންގުޅޭ އެންމެހާ ފަރާތްތަކުގެ މައުލޫމާތަށްޓަކައި އަންގާ ކަމަށެވެ. އަދި ބިދޭސީ މަސައްކަތްތެރިން، ގެންގުޅޭ ފަރާތްތަކުން މިކަމުގައި ސަރުކާރަށާއި، އެ ކައުންސިލަށް ފުރިހަމަ އެއްބާރުލުން ދިނުމަށް ވަނީ އިލްތިމާސްކޮށްފައެވެ.
ބިދޭސީ މަސައްކަތްތެރިންގެ ބަޔޯމެޓްރިކްސް ނެގުމުގެ މަސައްކަތް ކުރަމުންދާނީ ފުވައްމުލައް ސިޓީ ކައުންސިލް ފްރަންޓް އޮފީހުގައި ރަސްމީ ބަންދުނޫން ކޮންމެ ދުވަހެއްގެ 14:00 އިން 17:00 އަށް އަދި ހުކުރު ދުވަހުގެ މެންދުރު 14:00 އިން 17:00 އަށް، ރޭގަނޑު 20:00 އިން 22:00 އަށެވެ.
ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ދަށުން މިހާތަނަށް 6891 ބިދޭސީންގެ ބަޔޮމެޓްރިކް ޑާޓާ އެއްކޮށްފައިވާ ކަމަށް ދާޚިލީ ސަލާމަތާއިި ފަންނިއްޔާތާ ބެހޭ ވަޒީރު ޢަލީ އިޙްސާން މިދިޔަ މަހު ވަނީ ވިދާޅުވެފައެވެ.
މި ލިޔުން ކިޔާލުމުން
