ސެލްހާސްޓް ޕާކްގައި ރޭ ކުޅުނު އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި ކްރިސްޓަލް ޕެލަސްގެ މެޗު ދެޓީމުން ކުރެ އެއްވެސް ޓީމަކަށް ގޯލެއް ކާމިޔާބު ނުކުރެވި އެއްވަރުވެގެން ނިމިއްޖެއެވެ.
މި މެޗުގައި ދެ ޓީމަށް ވެސް ލަނޑު ޖަހަން ރަނގަޅު ފުރުސަތުތަކެއް ލިބުނެވެ. މެޗުގެ ފުރަތަމަ ހާފުގައި މެންޗެސްޓާރ ޔުނައިޓެޑުން ރަނގަޅު ކުޅުމެއް ދައްކައި ކްރިސްޓަލް ޕެލަސްގެ ގޯލަށް ނުރައްކާތެރި ހަމަލާތަކެއް ވަނީ ފޮނުވާފައެވެ. މި ގޮތުން މެސްޗެސްޓާރގެ އަލެހަންދުރޯ ގާނާޗޯ އާއި ބުރޫނޯ ފާނެންޑޭޒް އަށް ލިބުނު ފުރުސަތު ފާހަގަކޮށްލެވެއެވެ.
ގާނާޗޯ ފޮނުވާލި އެއް ހަމަލާއެއް ވަނީ ގޯލުގެ ދަނޑި އަށް އަމާޒުވެފައެވެ. އަދި އިތުރު ދެ ހަމަލާ ކްރިސްޓަލް ޕެލަސްގެ ކީޕަރު ޑީން ހެންޑާސަން ވަނީ ދިފާއުކޮށްފައެވެ. ބުރޫނޯ ފާނެންޑޭޒް ފޮނުވާލި ހަމަލާވެސް އަމާޒުވީ ގޯލުގެ ދަނޑިއަށެވެ.
މެޗުގެ ދެވަނަ ހާފުގައި ކްރިސްޓަލް ޕެލަސްގެ ކުޅުން ރަނގަޅުކޮށް މެންޗެސްޓާރގެ ގޯލަށް ނުރައްކާ ކުރަން ފެށިއެވެ. މިގޮތުން އެ ޓީމުގެ އެޑީ އެންކޭޓިއާ އާއި އިސްމައިލާ ސާރ ލިބުނު ފުރުސަތުގެ ފާހަގަކޮށްލެވެއެވެ. އެޑީ ގޯލަށް ފޮނުވާލި ބޯޅަ ކީޕަރު އަތުން ޖަހައި ކުޅުމުގެ ތެރެއަށް ފޮނުވާލުމުން އިސްމައިލާ ސާރ އަށް ލިބި އަނެއްކާވެސް ގޯލަށް ފޮނުވާލިއެވެ. ނަމަވެސް ކީޕަރުގެ ހުށިޔާރު ކަމުން އެ ހަމަލާ ވެސް ދިފާޢު ކުރިއެވެ.
އެހެން ކަމުން މެޗުގެ ވަގުތު ހަމަވިރު އޮތް 0-0 ގެ ނަތީޖާ އިން ދެ ޓީމު އެއްވަރުވެ މެޗު ވަނީ ނިމިފައެވެ. ރޭގައި ދެން ކުޅުނު ސައުތެމްޓަން އާއި އިޕްސްވިޗް މެޗުވެސް ނިމުނީ 1-1 ގެ ނަތީޖާއަކުން ދެ ޓީމު އެއްވަރު ވެގެންނެވެ.
މި ލިޔުން ކިޔާލުމުން
