ސްރީލަންކާގައި އިއްޔެ ބޭއްވި ރިޔާސީ އިންތިޚާބުގެ ކުރީގައި އުޅެނީ އެ ގައުމުގެ ކުޑަ ޕާޓީއެއް ކަމުގައި ޖަނަތަ ވިމުކްތީ ޕެރެމޫނާ (ޖޭވީޕީ) ޕާޓީގެ ފަރާތުން ވާދަކުރި ކެންޑިޑޭޓް އަނޫރާ ކުމާރާ ޑިސަނަޔަކެ ކަމަށް މިހާތަނަށް ގުނި ވޯޓު ފޮށިތަކުގެ ނަތީޖާއިން ދައްކައިފިއެވެ.
އަނޫރާ އަށް މިހާތަނަށް ލިބިފައިވާ ވޯޓުގެ އަދަދު 50 ޕަސެންޓާއި ކައިރި ކުރާއިރު، މި އިންތިޚާބުން 50 ޕަސެންޓަށް ވުރެ މަތިން އަނޫރާ އަށް ވޯޓު ލިބޭނެ ކަމަށް ތަޖުރިބާ ކާރުން ވިދާޅުވެއެވެ. ނަމަވެސް އެއްވެސް ކެންޑިޑޭޓަކަށް 50 ޕަސެންޓަށް ވުރެ މަތިން ވޯޓު ނުލިބިއްޖެ ނަމަ އިންތިޚާބުގެ ދެވަނަ ބުރަކަށް ދާން ޖެހޭނެއެވެ.
މިހާތަނަށް ގުނި ވޯޓުން ދެވަނައިގައި އިދިކޮޅު ލީޑަރު ސަޖިތު ޕްރެމަދާސަ 20 ޕަސެންޓް ވޯޓާއި އެކު އޮތްއިރު ތިންވަނައިގައި 18 ޕަސެންޓު ވޯޓާއި އެކީ އޮތީ ލަންކާގެ މިހާރުގެ ރައީސް ރަނިލް ވިކްރެމަސިންހަ އެވެ.
އުމުރުން 55 އަހަރުގެ އަނޫރާ އަކީ ދެންތިއްބެވި ކެންޑިޑޭޓުންނާއި ޚިލާފަށް ސިޔާސީ ވަރުގަދަ ޢާއިލާއަކަށް ނިސްބަތްވާ ބޭފުޅެއް ނޫނެވެ. އަނޫރާގެ މަޤްބޫލުކަން އިތުރުވީ ކޮރަޕްޝަނާއި ދެކޮޅަށް އިއުލާން ކުރެވި ސިޔާސަތު ތަކުގެ ސަބަބުންނާއި ފަޤީރުންގެ ވެލްފެއާ ގެ ކަންކަމާއި ބާޒާރުގެ އަގުތައް ކޮންޓްރޯލް ކުރުމަށް ވެ ވަޑައިގެންނެވި ވައުދު ތަކުގެ ސަބަބުންނެވެ.
މި އިންތިޚާބުގައި 38 ކެންޑީޑޭޓުން ވާދަކުރި އިރު ފާހަގަ ކޮށްލެވޭ ކެންޑިޑޭޓުންގެ ތެރޭގައި ލަންކާގެ ކުރީގެ ރައީސް މަހިންދަ ރާޖަޕަކްސަގެ ދަރިކަލުން ނަމާލް ރާޖަޕަކްސަ ހިމެނެއެވެ. ނަމާލް ވަނީ މިހާރު ބަލި ޤަބޫލު ކޮށް އެކަން އިއުލާން ވެސް ކޮށްފައެވެ.
މިއީ މިހާތަނަށް ސްރީލަންކާގައި ބޭއްވުނު އެންމެ ސުލްހަވެރި ރިޔާސީ އިންތިޚާބުކަމަށް އެގައުމުގެ އިލެކްޝަންސް ކޮމިޝަނުން މައުލޫމާތު ދެއެވެ.
މި ލިޔުން ކިޔާލުމުން
