ކާވާ ވިމެންސް ވޮލީބޯލް ކުލަބް ޗެމްޕިއަންޝިޕްގައި ރާއްޖޭގެ ޕޮލިސް ކުލަބާއި ތަޖިކިސްތާންގެ ވީސީ ޑިއަމެޑް ވާދަކުރި މެޗު ރާއްޖޭގެ ޕޮލިސް ކުލަބުން ކާމިޔާބުކޮށްފިއެވެ.
ސޯޝަލް ސެންޓަރުގައި ކުޅުނު މި މެޗު ޕޮލިސް ކުލަބުން މެޗު ކާމިޔާބުކޮށްފައިވަނީ 3-2 ސެޓުންނެވެ.
މިމެޗުގެ ފުރަތަމަ ސެޓު ކާމިޔާބުކޮށް ފައިވަނީ ވީސީ ޑިއަމެޑްއިންނެވެ. ނަމަވެސް 2 ވަނަ ސެޓު ކާމިޔާބުކޮށް ޕޮލިސް ކްލަބުން ނަތީޖާ އެއްވަރު ކުރިއެވެ. މެޗުގެ ތިންވަނަ ސެޓު ވީސީ ޑިއަމެޑް ކާމިޔާބުކޮށް ޕޮލިސް ކްލަބްގެ މައްޗަށް ކުރި ހޯދާފައިވަނިކޮށް ހަތަރު ވަނަ ސެޓާއި ފަސް ވަނަ ސެޓު ކާމިޔާބު ކޮށް ޕޮލިސްކްލަބުން ވަނީ މިމެޗުން މޮޅުވެފައެވެ.
ކާވާ ވިމެންސް ކުލަބް ޗެމްޕިއަންޝިޕްގެ ތިން ވަނަ ހޮވާ މެޗުގައި ވާދަކުރާނީ ރާއްޖޭގެ ކުލަބް ވެމްކޯ އާއި ސްރީލަންކާ އެއާ ފޯސް ޓީމެވެ. މި މެޗު މިއަދު ހަވީރު 4:00 ގައި ފެށުމަށް ހަމަ ޖެހިފައިވާއިރު، މުބާރާތުގެ ފައިނަލް މެޗު މިރޭ ކުޅޭނެއެވެ. ފައިނަލް މެޗުގައި ވާދަކުރާނީ ނޭޕާލް ޕޮލިސް ކުލަބާއި އުޒްބަކިސްތާންގެ ހޫމޯ ވީސީއެވެ. މި މެޗު ފަށާނީ މިރޭ 8:30 ގައެވެ.
މި ލިޔުން ކިޔާލުމުން
